Kërkohet kualicion në mes Besës dhe Aleancës.. (VIDEO)

Fatmir Limani i cili së fundmi iu bashkua Lëvizjes BESA, kërkon koalicion me Aleancën për shqiptarët në zgjedhjet e ardhshme parlamentare.

Limani i cili njihet edhe si nipi i liderit të BDI-së Ali Ahmeti, madje tha se kusht për të fituar BDI-në është që BESA dhe ASH të dalin me lista të përbashkëta.

“Ne si opozitë shqiptare duhet t’i bindim se jemi ndryshe nga të tjerët, në rast se nuk i bindim nuk ka vota. Do të jetë me aktin e bashkimit të opozitës shqiptare. Unë e di se Arben Taravari ka disponim. E di”, tha Fatmir Limani, Lëvizja Besa.

Por a do të pranojë ASH edhe një koalicion, pas asaj që i ndodhi me RDK-në e Vesel Memedid dhe së fundmi me Alternativën e Afrim Gashit?

Arben Taravari për TV21 thekson se Aleanca për Shqiptarët gjithnjë ka qenë pro bashkëpunimeve opozitare.
“Në parim Aleanca për Shqiptarët, gjithnjë ka qenë dhe do të vazhdojë të jetë e hapur për bashkëpunime, por përsëri vendimet përfundimtare opozitare për bashkëpunimet eventuale i sjellin organet partiake të Aleancës për Shqiptarët.

Nuk dua ta marr atë ekskluzivitet, po as që e kam atë ekskluzivitet që të them kështu do të jetë apo ashtu”, pohoi Arben Taravari, Aleanca për Shqiptarët.

Limani gjithashtu theksoi se refuzimi eventual për bashkëpunim qoftë nga Aleanca për Shqiptarët, qoftë nga vetë Lëvizja Besa i bie se njëra prej tyre është fraksion i BDI-së.

Megjithatë, këtë qëndrim nuk deshi ta komentoj aspak Arben Taravari, sipas të cilit Aleanca për Shqiptarët është e vetmja që ka dëshmuar gjithmonë gatishmëri për bashkëpunime kundër politikave keqdashëse të BDI-së.

VIDEO:

/tv21