Kërçovë: Askush nuk po i mbaron punët e nisura para zgjedhjeve..! (VIDEO)

Para zgjedhjeve të fundit lokale nisën punimet për rikonstruktimin e rrugës dhe ujësjellësit në lagjen “Uzhiçka” në Kërçovë.

U gërrye rruga, u hap kanali i ujësjellësit dhe që atëherë nuk është prekur asgjë me dorë! Banorët e kësaj lagjeje ankohen se po u shkatërrohen veturat dhe rrezikohen edhe kur ecin në këmbë.

“Rruga ka filluar të ndërtohet ose rikonstruktohet që para zgjedhjeve, megjithatë tani për momentin e shihni edhe vetë në çfarë gjendje është, që në të vërtet për këtë popull këtu është shumë e neveritshme dhe nuk është aspak mirë për këtë periudhë të vitit”, tha Gullab Serafillovski, banor.

Afër hekurudhës është një kanal i betonuar ai është mbushur me ujë dhe mbeturina dhe kundërmon erë e keqe. Bashkësia lokale disa herë ka kërkuar zgjidhje, por asgjë nuk është ndërmarrë.

“Aty mblidhet ujë dhe në verë ka milion bretkosa dhe lloje të ndryshme insektesh të cilat mund të ndihmojnë në zgjerimin e pandemisë në Maqedoni”, pohoi Gullab Serafillovski, banor.

Para zgjedhjeve lokale të tetorit ka nisur edhe rikonstruktimi i rrjetit ujësjellës.
Problem tjetër i lagjes janë edhe mbeturinat, që sipas banorëve nuk mblidhen me nga një muaj.

“Sa u takon mbeturinave pas një muaji NP “Komunalec” erdhën dhe ata aty që ishin mbledhur i mblodhën, ndërsa ne faturat i paguajmë në rregull. Pa dashur t’i lëndoj njerëzit në bazë profesionale por ne paguajmë për higjienë, por mbeturina kemi shumë”, tha Gullab Serafillovski, banor.

Për problemin me mbeturinat nëpër lagjet e qytetit dhe nëpër fshatra u diskutua edhe në mbledhjen e fundit të këshillit të Komunës së Kërçovës. Këshilltari i BDI-së Argjend Asani kërkoi nga Komuna një plan për mbeturinat në Zajaz dhe në përgjithësi në Kërçovë.

“Kohëve të fundit shumica e qytetarëve vijnë dhe i hedhin mbeturinat në qytet, ndërsa pjesa tjetër të cilët nuk mund ta bëjnë këtë gjë nuk kanë ku ti hedhin mbeturinat, a keni ndonjë plan konkret për pjesën e Zajazit?”, deklaroi argjent asani, këshilltar i BDI-së.

Nga ndërmarrja komunale “Komunalec” në lidhje me lagjen “Uzhiçka” i thanë TV21 se mbeturinat i pastrojnë në orën e caktuar megjithatë banorët i hedhin mbeturinat jashtë kontejnerëve.

E sa i takon rikonstruktimit të ujësjellësit që është hapur thanë se nuk kanë mundur të punojnë për shkak të temperaturave të ulëta, ndërsa premtuan se nga java e ardhshme do të fillojnë sërish punimet për mbulimin e kanalit si dhe rikonstruktimin e rrugës.

VIDEO:

/tv21