Arrihet marrëveshja ! Do të rikonstruohet magjistralja Manastir – Kërçovë..

Nuk do të ketë më protesta për rrugën Manastir-Kërçovë, kjo pasi sot është arritur marrëveshje mes bashkësive lokale të këtij rajoni, drejtorit të Ndërmarrjes Publike “Makedonija pat”, drejtorit të Ndërmarrjes Publike “Rrugët shtetërore” dhe ministrit të Transportit dhe Lidhjeve.

Marrëveshja, siç bëjnë të ditur kryetarët e bashkësive lokale, parasheh “rehabilitim të aksit rrugor Demir Hisar – Drugovo në gjatësi prej 12 kilometrash”.

“Fillimi i rikonstruimit do të fillojë menjëherë sapo të lejojnë kushtet atmosferike për punë në bazamentin e asfaltit. Gjithashtu është konstatuar se rehabilitimi i pjesës tjetër të aksit rrugore do të jetë në fillim të vitit 2023. Takimi kaloi në atmosferë të mirë të kënaqur kanë mbetur të gjitha palët. Protestat në aksin rrugore përkohësisht do të ndërpriten”, njoftuan për TV21 kryetarët e bashkësive lokale.

Për këtë problem ka raportuar edhe TV21, pasi rruga magjistrale Kërçovë-Manastir në çdo 2 metra ka gropa dhe krisje të asfaltit. Rruga më e vështirë për të kaluar bëhet sapo fillojnë fshatrat e Komunës së Demir Hisarit.

Për këtë qytetarët e kësaj ane dolën në rrugë dhe bllokuan qarkullimin e veturave. Kërkuan takimin me krerët institucionalë, por atë ditë asnjëri nga ata nuk ishin të pranishëm. Të revoltuar paralajmëruan protesta edhe për nesër, por e njëjta anulohet, pasi nga takimi i sotëm mes krerëve të bashkësive lokale dhe institucionale, është arritur marrëveshje për rregullimin e këtij aksi rrugor.

Në vitin 2020 drejtori i atëhershëm i NP “Rrugëve Shtetërore” Zoran Kitanov premtoi rehabilitimin e 300km rrugë në pjesën perëndimore të vendit brenda 1 viti, ku po përfshihej edhe kjo rrugë magjistrale, por prej 300 km u ndërtuan vetëm 25 km rrugë.

/tv21