Kërçovë: Rrugët e Drugovës të shkatërruara..!

Në muajin shtator të vitit 2020 duhej të fillonin punët për ndërtimin e rrugëve në fshatin Drugovë të Kërçovës, të cilat janë të shkatërruara dhe plot gropa. Atë kohë këtë e tha edhe vetë kryetari i Komunës Fatmir Dehari.

“Mendoj se nga ky muaj, pra muaji shtator deri në qershor të vitit të ardhshëm jo vetëm një rrugicë që është kërkesë me prioritet por edhe disa rrugica tjera”, theksoi Fatmir Dehari, kryetar i Komunës së Kërçovës (30.08.2020).

Ky premtim u dha në gusht të vitit 2020, por edhe pse tanimë kemi hyrë në vitin 2022, gjendja e fshatit Drugovë, që është vetëm dy kilometra larg qytetit, edhe sot ishte e njëjtë si një vit më parë kur raportoi TV21.

Kryetari i Bashkësisë lokale të fshatit, Lube Mitresi, tha se ky fshat ballafaqohet me shumë probleme, si me mbeturinat, me kanalizimin, mungesën e ujit për pije gjatë verës dhe me rrugët e shkatërruara.

“Unë nuk kam parë të vijë dikush, vitin e kaluar është ndërtuar vetëm një rrugë atje tek komuna edhe në atë rrugë nuk mund të kalojmë tash, ja të kalojmë tash në vendngjarje do të shohësh Ne kërkojmë të na i plotësoj kushtet elementare, më prioritetet kemi kanalizimin sepse nëse kërkojmë rrugët, kanalizimi kur të vijë do prishen sërish”, theksoi Lube Mitresi, kryetar i Bashkësisë Lokale Drugovë.

Shqetësueses është fakti së në këtë fshat ku jetojnë rreth 2000 banorë, që çdo ditë përballen me erën e keqe të kanalizimit i cili rrjedh rrugëve të fshatit dhe kundërmon.
Ditën që morri mandatin e tretë, Dehari u zotua se nga ajo ditë e deri në fund të vitit 2022 do të investojë 20 milionë euro investime kapitale, duke përmendur këtu edhe ndërtimin e kanalizimit prej në Zajaz e deri në Drugovë.

Banorët kërkojnë të bashkëpunojnë me Deharin dhe t’i zgjidhin këto probleme elementare për të jetuar.
“Ne duam t’i dalim në ndihmë, duam t’ia shtrimë dorën Komunës së Kërçovës dhe kryetarit, çfarë duhet ne si qytetarë si këshilltarë dhe si bashkësi lokale të mundësojmë që kjo situatë të zgjidhet sa më parë”, tha Mihajllo Danielloski, banorë.

Banorët kanë hall edhe me mbeturinat e hedhura rreth rrugës në çdo pjesë të fshatit, e sidomos rreth kontejnerëve të cilat nuk mblidhen nga ndërmarrja komunale. Kjo sepse ndërmarrja merr vetëm mbeturinat nga kontejnerët, ndërsa ato që janë në tokë mbetet aty ku janë. Banorët thonë se paguajnë për mbledhjen e mbeturinave, por sërish fshati prapëseprapë është përplot me mbeturina.

VIDEO:

/tv21