A janë të sigurta urat në rrugën Kërçovë – Ohër..! (VIDEO)

Kështu është gjendja momentale e urave. Tek njëra sipërfaqet e dy anëve kanë filluar të hapen.
Krahas kësaj, kamera e TV21 fiksoi edhe këto pamje në pjesën e poshtme të urës që janë plasaritur, ka lagështi dhe pikon ujë.

“Këto janë dy urat e shumëpërfolura së fundmi në rrjetet sociale të cilat ndodhen në Presekë, d.m.th. në rrugën kryesore e cila lidh Kërçovën me Ohrin dhe Strugën por edhe pjesën Perëndimore të vendit më pjesën Lindore.

Kjo është rrugë kryesore në të cilën në ditë kalojnë qindra vetura dhe kamionë, së fundmi u diskua shumë nëse kjo urë është e sigurt apo jo, gjë të cilën do ta diskutojmë me institucionet relevante”, raporon gazetarja e TV21, Salije Sadiku.

Nga Ndërmarrja “Rrugë Shtetërore” thonë se kanë dalë në terren për të konstatuar gjendjen e urave dhe thonë se janë të qëndrueshme dhe nuk përbëjnë asnjë rrezik.
“Ju njoftojmë se është kryer kontroll në terren nga ekspertët dhe u konstatua se ka dëmtime në një mur krahu i cili duhet të sanohet, ndërsa elementet e tjera konstruktive, siç janë pllaka, mbajtëset dhe të tjera janë në gjendje të mirë, gjegjësisht nuk ka çrregullime në qëndrueshmërinë e urës.

NPRrSh do të ndërmarrë masa për eliminimin e dëmtimeve, do të përgatitet dokumentacion i projektit për sanimin e urës dhe do të parashihen mjete në planin për Prokurime Publike për vitin 2022”, thonë nga Ndërmarrja Publike “Rrugët shtetërore”.

Problematike të këtë aks është edhe rënia e gurëve dhe rrëshqitja e dheut gjatë gjithë kohës, sidomos në vjeshtë dhe dimër. Shpesh kur kalon në këtë rrugë magjistrale has në gurë të rënë nga mali. Viset më të larta kanë edhe mburojë, por siç duket as kjo nuk bën punë sepse është vjetruar dhe shkatërruar.

As mbrojtëset rreth rrugës nuk duken në gjendje të mirë, janë të shtrembëruara. Rruga është lënë pas dore për shkak se pritet ndërtimi i autostradës së re Kërçovë-Ohër e cila ende nuk dihet se kur do të përfundojë.

VIDEO:

/tv21