Zeni Ballazhi sërish i pari me simbolet kombëtare..
Ditë më parë, në konkursin për realizimin e logos për kremtimin e “Javës së Flamurit”, të shpallur nga Ministria e Kulturës së Republikës së Shqiperisë, me qëllim të aktiviteteve festive për 28-29 Nëntorin 2021, mes shumë propozimesh nga artistë të të gjitha trevave shqiptare, krijimi i dizajnuar nga Zeni Ballazhit është shpallur fitues, bën të ditur ministrja Elva Margariti përmes një postimi në Facebook dhe Instagram.
Ajo, në mes tjerash, shkruan:
“Shqiponja e artistit Zeni Ballazhi tani po shoqëron evenimentet zyrtare të Institucioneve Qendrore Shtetërore, si pjesë identifikuese e festimeve në këtë kuadër. Logoja është simbolike përfaqësuese përgjatë kremtimit të “Javës së Flamurit” për vitin 2021”.
Ndërsa, vetë autori, fitues i shumë çmimeve kombëtare e ndërkombëtare, Zeni Ballazhi, po ashtu ka shkruar edhe në Facebookun e tij: “Festa jonë kombëtare që na bënë bashkë, “shërim për shpirtrat e trazuar nga tragjedia, dhimbja…2021”.Për ditë më të lumtura dhe për bashkim të radhës: me festë, dashuri dhe besim”, përfundon ai.
Zeni Ballazhi, tashmë i njohur jo vetëm si fitues i këtij konkursi, ai është edhe fitues i logos për nder të 100 vjetorit të pavarësisë. Janë vijat e thjeshta, përmes të cilave autori përcjellë simbolikën e madhe nacionale, plot kreativitet e mesazhe të jashtëzakonshme, shkruan Gazeta Demos.
Por kush është në të vërtetë artisti Zeni Ballazhi?
Zeni Ballazhi u lind në vitin 1975, në Kërçovë – Maqedoni. Mësimet fillore dhe të mesme i mbaroi në vendëlindje, kurse Akademinë e Arteve të Bukura në Tiranë – Shqipëri (1998).
Në vitin 2000 merr titullin Magjistër i Arteve, në Fakultetin e Arteve në Universitetit të Prishtinës – Kosovë. Po të njëjtin vit përfundon kursin e specializimit në Kolegjin Nacional të Arteve të Osllos në Norvegji (ONCA).
Gjithashtu, Ballazhi ka përfunduar studimet për doktoraturë në degën e Shkencave Histori e Artit Shqiptar në Akademinë e Studimeve Albanologjike në Tiranë – Shqipëri, ku mori titullin “Doktor i shkencave” (2019).
Prej vitit 2001 – 2020 punon si kurator dhe dizajner në Galerinë Kombëtare të Kosovës. Në shkurt – korrik 2009, dhe nga shtatori i vitit 2015, deri në gusht të vitit 2016, nga Ministria e Kulturës, Rinisë dhe Sporteve të Kosovës, emrohet Ushtrues Detyre i Drejtorit së Galerisë Kombëtare të Kosovës.
Ka hapur disa ekspozita personale dhe ka marrë pjesë në shumë ekspozita kolektive në Kosovë dhe jashtë saj (Shqipëri, Maqedoni, Norvegji, Francë, Japoni, Gjeorgji, Greqi, Slloveni, SHBA, Hungari, Austri, Kroaci, Zvicër etj).
Ballazhi është kurator i shumë ekspozitave të organizuara në Kosovë dhe rajon.
Ka punuar si drejtor artistik (skenograf) në dhjetëra filma dhe shfaqje profesionale me koproduksione të ndryshme, si dhe festivale ndërkombëtare në: Maqedoni, Kosovë, Shqipëri, Norvegji, Kroaci, SHBA etj.
Njëkohësisht ai ishte menaxher artistik shumëvjeçar i Festivalit Ndërkombëtar të Monodramës “MonoAKT” si dhe pjesëmarrës në shumë festivale ndërkombëtare të filmit dhe teatrit: (Maqedoni, Shqipëri, Mali i Zi, Bullgari, Norvegji, Gjermani, Mongoli, Zvicër, Ukrainë, Rumuni, Dagestan, Moldavi, Egjipt, Rusi etj).
Prej vitit 2013 – 2016 është ligjërues në drejtimin Arti Konceptual dhe mediet e reja në Universitetin “Hasan Prishtina”, Fakulteti i Arteve, si dhe në Universitetin Shtetëror të Tetovës – Maqedoni. Në shkurt të vitit 2016, bëhet Anëtar i Akademisë Evropiane të Filmit “European Film Academy”, në Berlin, Gjermani. Vepra e tij ndodhet edhe në koleksionin e Muzeut “Nëna Tereze” në Shkup të Maqedonisë dhe Imago Mundi Luciano Benetton Collection. Është laureuar me shumë çmime kombëtare dhe ndërkombëtare.
Emrin e tij e mban edhe logo e “100 Vjet Pavarësi”, Republika e Shqipërisë ku më 26 dhjetor 2012, me rastin e 100 vjetorit, dekorohet nga Presidenti i Republikës së Shqipërisë me “Medalja e Mirënjohjes”. Është autor edhe i logos dhe medaljes presidenciale “Kosova 10 Vjet Pavarësi”. Aktualisht është Profesor Asistent në Fakultetin e Arteve në Universitetin “Hasan Prishtina” si dhe kritik i arteve vizuale për artistë të veçantë.
/Gazeta Demos/
