Mërgata nuk jan vetëm për vota mjet për një përdorim.. Nga Arbër Çeliku

Mërgata shqiptare të mos lejojë më të jetë mjet për një përdorim
Kontributi, sakrifica, mundi dhe vetëmohimi i mërgatës shqiptare ka qenë i parezervë këtë shekull për avancimin e çështjes kombëtare.

Pavarësisht të gjithave pengesave në vende të huaja, dashuria për kombin, atdheun, për të afërmin, për tokat tona nuk u shua kurrë. Madje, me plot gojën, mund të pohoj se patriotizmi gëlon shumë më shumë në vendet e huaja, ku ndodhet pjesa e gjakut tonë, se sa në vendet tona amë.

Mërgata jonë, edhe pse me plot halle vetë, nuk rreshti kurrë të vetëflijohet për atdheun. Qysh në komunizëm u ftillua pikërisht nga mërgata ideali për komb, për liri dhe demokraci dhe u intensifikua me rënien e komunizmit. Patriotët tanë nga SHBA-të, Gjermania, Zvicra dhe gjetkë në Evropë dhe botë, derdhën miliarda dollarë për luftën e Kosovës, Luginës dhe Maqedonisë.
Vetëflijimi i tyre, sakrifica, mundi dhe kontributi i tyre nuk u shpërblyen as për së afërmi nga qeveritë tona.

Ata nuk patën asnjë përfaqësim politik deri më sot, as në këshillat komunalë, as në parlamentet tona dhe as në qeveri. Madje, nuk patën as lehtësime për investime në tokat e tyre, disa sosh madje u rrjepën me ryshfete që ua kërkonin sherifët lokalë.

Sot më bëhet zemra mal, që ata në Kosovë sollën rrëzimin e qeverisjes grabitqare, dy herë radhazi Kërçovën tonë e bënë të frymojë shqip dhe ja, ku kushtrimin e kanë dhënë edhe për së treti herë. Sa herë që e do nevoja, ata vijnë për një jetë më të mirë tonën, në Strugë, Kërçovë, Gostivar dhe gjetkë. Pa asnjë interes, vetëm me zemër të gufuar për tokën e tyre, për gjakun e tyre, për ne, të cilët jemi bërë pikë e pesë këto 3 dekada demokraci.

Unë vërtet i admiroj këta njerëz kaq humanë, patriotë të devotshëm dhe zemërbardhë. Megjithatë, do t’u kisha bërë thirrje, që të fillojnë të kërkojnë hisen e tyre në tokat e tyre. Në këmbim të votës, në radhë të parë, të kërkojnë përfaqësim në piramidën e shtetit dhe në rrafshin komunal nga Struga e deri në Kumanovë. Të kërkojnë toka shtetërore me 0 pagesë për investime, të kërkojnë lehtësime në krijimin e bizneseve të tyre dhe të kërkojnë eliminimin nga skena politike të sherifëve lokalë, që të mos mundet më askush t’i rrjepë ata për idetë e tyre biznesore.

Të dashur bashkatdhetarë që jetoni dhe veproni në mërgim, nëse nuk filloni ta bëni këtë, si e para, ne që jetojmë dhe veprojmë këtu, gjithmonë do të jemi të ndarë e të përçarë, disa do të jenë të privilegjuar dhe disa të përçmuar, disa do të shijojnë të mirat e pushtetit në varësi të rrotacioneve të pushtetit dhe disa do t’ju bashkohen juve nëpër vendet, që vetëm zemra jua di se si jetoni.

Së dyti, ky vend pa kontributin tuaj, investimet tuaja, idetë biznesore në të ardhmen, do të shndërrohet në një vatër zjarri të ekonomisë, politikës dhe bashkëjetesës së dështuar. Së treti, ju nuk jeni vetëm një vrojtues pasiv i ngjarjeve tona kombëtare, që ka kohë që kanë ngecur në vend dhe, sa vjen e më shumë, po shndërrohen në mjet tregtimi.

Ju nuk duhet më të lejoni të jeni mjet për një përdorim, sa herë që politika të ketë nevojë për votën tuaj, por të merrni pjesë aktive në jetën tonë shoqërore, politike, ekonomike dhe kulturore.
Rrofshi e qofshi përgjithmonë!
Shkruan dr.prof Arbër Çeliku në facebook

/ms