Kush është Lumturije Axhami..?

Lumturije Axhami, lindi në vitin 1969, në Han të Elezit. Shkollën fillore e kreu në vendlindje, kurse të mesmen në Shkup. Talenti i saj për muzikë u vërejt shumë herët. Që në moshën tetëvjeçare filloi të këndonte në SHKA “Emin Duraku” të Shkupit dhe në “Sharri” të Hanit të Elezit. Shquhej për një zë të ëmbël dhe për sharm skenik. Regjistrimet e saj të para u bënë në Radio-Prishtinë dhe në Radio-Shkup.

Në vitin 1981 mori pjesë në Festivalin e këngëve popullore në Itali, në kuadër të shoqërisë “Emin Duraku”, me ç’rast u shpërblye me çmimin “Debutuesja më e suksesshme”. Kjo nismë do të vazhdojë me suksese të reja në Festivalin e Kaçanikut, Suharekës dhe Gjilanit, ku do të pritet gjithnjë me ovacione dhe me duartrokitje frenetike nga publiku. Nga pjesëmarrjet në festivale vlen të përmendet: “Kosovarja këndon” në vitin 1984, ku e mori çmimin e parë. Po ashtu, festivalet “Vera e Shkupit” dhe “Akordet e Kosovës” e plotësojnë biografinë e saj artistike.

Zëri i Lumturije Axhamit ishte i preferuar për shumë kompozitorë, të cilët e motivuan në rrugën drejt artit, si: Enver Stafaj, Fahri Beqiri e Nehat Hoxha. Për herë të parë, produksioni muzikor i Radio-Prishtinës startoi me albumin e kësaj këngëtareje “Sokolat e Dibrës”, në vitin 1984. Këto këngë fituan shumë popullaritet në mbarë trevat e ish-Jugosllavisë ku jetonin shqiptarët. Të gjitha këto këngë Lumturije Axhami i xhiroi në Televizionin e Shkupit me regjisorët Afet Miftari e Zukri Fejzullahu.

Albumi i dytë “Premtimi” u editua në vitin 1990, me produksionin “Labia”, që i theu të gjithë parametrat e parashikimeve në tirazhin e tregut muzikor të asaj kohe. Kështu, zëri i Lumturije Axhamit do të jehonte dhe do të mbushte sallat e koncerteve publike anembanë trevave shqiptare. Ajo shquhet si artiste shumë e veçantë e këngës popullore. Në vitin 1990, Televizioni i Shkupit realizon videoklipet e para shqiptare

. Në mesin e katër këngëve të realizuara nga regjisori Zukri Fejzullahu, ishte edhe hiti Jeta duhet rrjedhë, në duet nga Avni Aliu dhe Lumturije Axhami. Kjo këngë ishte tejet e popullarizuar, për shkak se e mbushte sado pak boshllëkun që vërehej në stilin e muzikës së lehtë, meqë deri në këtë kohë, në Maqedoni, muzika folklorike e popullore ishte tepër e përhapur.

Albume të tjera të këngëtares Axhami do të sjellin shumë këngë të veçanta. Është e para këngëtare që i është lutur Zotit nëpërmjet gjuhës muzikore, me tekste e muzikë origjinale. Me fat bajrami është një projekt, këngët e të cilit u xhiruan dhe jepeshin në çdo festë. Bashkëpunimi i saj me artistë nga Shqipëria ishte i hershëm. Vlen të përmendet ai me Bujar Lakon në melodramën Buka me shtatë kore, me regji të Zukri Fejzullahut, Sefedin Nuredinit e Shkëlzen Halimit. Vitet e fundit, me rënien e interesimit për albume muzikore, nuk ka edituar diçka të re, por ka realizuar këngë të ndryshme dhe është shfaqur në disa ekrane televizive, veçanërisht në TVM-2.
Shkruan Valmir Aziri

/ms