Opozita tërheq kandidatin për Kërçovën..! (VIDEO)

Kërçova me shumë gjasa do të mbetet me 3 kandidatë për zgjedhjet lokale. Kjo për shkak se Alternativa është tërhequr nga kandidimi i Mazllam Osmanit për këtë komunë, e këtë e bëri 3 ditë pas shpalljes. Thonë se nuk mund të bëjnë asnjë veprim që mund të jetë në dëm të shqiptarëve, ndërsa gjykojnë se Kërçova është peshorja e ndërgjegjes sonë kombëtare.

“Ndonëse përçarja e votës ka filluar qëkur BDI-ja insiston me ngulm që të nxjerrë kandidat puro-partiak dhe atë ta shesë në emër të kombit, ne nuk duam të jemi aktorë në temën e përçarjes së votës shqiptare. Duke qenë të prirë për t’i vendosur interesat kombëtare para atyre partiake, por edhe duke e respektuar thirrjen e mërgatës për unifikim, ne disa herë në të kaluarën kemi bërë thirrje që në Kërçovë të kandidojmë me një kandidat të përbashkët shqiptar, por kjo nuk ka ndodhur pikërisht për shkak të insistimit të BDI-së për kandidat partiak”, tha Nurxhan Asanoska nga Alternativa.

TV21 mëson se kjo parti do ta përkrah kandidatin e pavarur Fatmir Limanin dhe presin që vendimin e njëjtë ta marr edhe partneri i tyre i koalicionit Aleanca për Shqiptarët. Kërkuam qëndrim nga ASH-ja se cilin do të përkrahin, por nga atje thonë se çdo vendim do ta marrin bashkërisht me partnerin e koalicionit.

“Siç e dini ne jemi ne koalicion me Alternativën dhe në saje të këtij bashkëpunimi në nivel shteti ram dakord që në Kërçovë të garojmë me kandidat nga koalicioni i cili do të jetë nga radhët e partnerit tonë Alternativa. Për çdo vendim ndryshe në të ardhmen ne do të jemi unik në qëndrimin e përbashkët me partnerin e koalicionit dhe kandidatin Mazllam Osmani”, tha Remzi Mehmedi nga Aleanca për Shqiptarët.

Krahas kandidatit të pavarur Limani, në garë për të parin e Kërçovës janë edhe Fatmir Dehari nga BDI-ja si dhe Aleksandër Jovanoski nga VMRO-DPMNE. LSDM-ja nuk do të nxjerrë kandidat, por do të garoj vetëm me listë këshilltarësh, bashkë me koalicionet. Nga kjo parti ende nuk e kanë vendosur cilin nga kandidatët e lartpërmendur do të përkrahin. I thanë TV21 se këtë do ta diskutojnë me partnerin qeveritar, e që në këtë rast është BDI-ja.

“Për momentin nuk kemi biseduar, megjithatë sipas logjikës së ngjarjeve, siç e dini në qeverinë qendrore kemi partner koalicioni dhe do të na informojnë se si të veprojmë”, tha Stanko Trpeski nga Dega e LSDM-së Kërçovë më 07.09.2021.

Zgjedhjet do të mbahen më 17 tetor dhe me sa duket Kërçova do të jetë një nga garat më të nxehta, aq më tepër në aspekt të asaj se kush kë do ta përkrahë, qoftë në rrethin e parë ose eventualisht të dytin e zgjedhjeve.

VIDEO:

/tv21