Fshati Cërvicë i Kërçovës me shkollë të re..(VIDEO)
Shkolla periferike “Millto Gurra” e fshatit Cërvicë ishte ndërtuar në vitet e 70-ta nga vetë banorët e fshatit dhe që atëherë shumë gjenerata janë arsimuar në këtë objekt, por që kohëve të fundit ajo filloi të pikojë ujë dhe të shkatërrohet dalëngadalë. Gjatë dimrit nëpër klasa pikonte ujë nga tavani, sepse siç thonin banorët ajo ishte kalbur përbrenda edhe pse në pamje dukej e fortë. Këtë problem TV21 e ka raportuar në muajin tetor.
Por gjithë kësaj i erdhi fundi pasi kjo shkollë u rrënua dhe po ndërtohet objekti i ri i kësaj shkolle me të gjitha standardet e nevojshme për një proces të rregullt edukativo arsimor, dhe vlera e tij është 33 milionë e 739 mijë denarë.
Kryetari i Komunës së Kërçovës Fatmir Dehari tha se punimet kanë nisur qe 10 ditë dhe po ecin me një dinamikë të shpejtë për të arritur që në shtator nxënësit të mësojnë këtu.
“Mund të them që një ëndërr e këtyre banorëve të mëhershëm dhe të tanishëm në veçanti një ëndërr e diasporës së këtij fshati, ne sot e realizojmë, pra e bëjmë realitet dhe të realizosh një ëndërr për mua dhe për të gjithë ne është një fakt një argument është një motiv për të vazhduar edhe më tej, me ndërtimin e kësaj shkolle ne arrijmë të përmbyllim përqindjen më të lartë të ndërtimit të shkollave”, deklaroi Dehari.
Të gëzuar nga kjo shkollë e re e cila ndërtohet banorët e fshatit shpresojnë që në shtator fëmijët e tyre ta fillojnë vitin në shkollën e re.
“E kemi pritur me shpirt që për një pjesë të madhe të fshatarëve është diçka si ëndërr e presim me shumë qef”, u shpreh Betim Klosi, kryetar i bashkësisë lokale Cërvicë.
Delegacioni i komunës bashkë me drejtorin e Ndërmarrjes “Komunalec” gjithashtu bënë hapjen solemne të ujësjellësit në fshatin Kolibar, fshat ky që për 35 vjet ka qenë në hall me ujin. Çdo herë kanë pasur mungesë, ngase kanë qenë të lidhur te uji i Zajazit por ai ka qenë i pamjaftueshëm për të gjithë fshatrat.
“Kostoja financiare e këtij projekti është 150 mijë euro dhe është realizuar në dinamikën e paraparë, ndoshta edhe më shpejt”, shtoi më tej Dehari.
Kjo çesmë këtu në pjesën e epërme të fshatit është e vendosur mbi 40 vjet dhe asnjëherë s’ka pasur ujë, sot për herë të parë pas 40 vjetësh ajo rrjedh ujë.
VIDEO:
/tv21
