ALTERNATIVA i përgjigjet Mërgatës Shqiptare të Kërçovës – jeni pjesë e trungut tonë.

Të nderuar mërgimtarë,
Ideja, vullneti dhe dëshira për ta bërë Kërçovën një qytet më të mirë na bën që të mendojmë më mirë, veprojmë më drejtë dhe kontribuojmë më shumë, të gjithë pa përjashtim, si ju që jeni jashtë vendit aq më shumë ne që punojmë e veprojmë këtu në vendlindje të organizuar në parti politike apo grupime qytetare.

Andaj, ne si Alternativë vlerësojmë se, ashtu siç kemi vepruar edhe më parë në zgjedhjet e vitit 2017, ndaj thirrjes suaj për zgjedhjet e ardhshme vendore edhe kësaj radhe i qasemi me seriozitetin dhe me sinqeritetin më të madh e këtë presim ta bëjnë të gjitha palët aktive në politikbërjen e Kërçovës.

Ne si subjekt politik e kuptojmë idenë qëllimmirë të mërgatës për të garuar me një kandidat të vetëm, me arsyetimin se ashtu pozita e kryetarit të komunës fitohet nga kandidat shqiptar, por na lejoni që këtu të rifreskojmë memorien tuaj dhe të gjithë secilit, se edhe përpara zgjedhjeve vendore të vitit 2017, nga ana e mërgatës shqiptare u kërkua që të kandidohet me një kandidat të vetëm në taborin e votuesve shqiptarë. Atëherë, vetëm grupimi ynë politik, e trajtoi seriozisht thirrjen tuaj dhe asaj ju përgjigj me shkrim (linku ku mund ta gjeni përgjigjen e asaj kohe https://www.facebook.com/TvGurra/posts/1740498382645525/ ).

Fatkeqësia e asaj kohe, por edhe e sotshme është se subjekti i BDI-së dhe eksponentët e saj nuk e panë të rrugës që t’i përgjigjen thirrjes së mërgatës dhe të reflektojnë në drejtim të bashkimit dhe unifikimit të faktorit shqiptarë. BDI parapëlqej që të injorojë mërgatën dhe subjektet opozitare shqiptare për ato zgjedhje sepse ashtu siç u pa ata kishin siguruar një bashkëpunim paraprak me LSDM. Është e drejta e tyre. Po ku qëndron këtu mërgata shqiptare e Kërçovës, kur bën thirrje për bashkim të shqiptarëve dhe kur ajo nuk përfillet nuk ka asnjë reagim dhe si është e mundur që edhe pas atij injorimi total nuk i kërkohet aspak llogari atij subjekti dhe kandidati për kryetar të cilin e mbështeti më së tepërmi (nën pretekstin – vetëm le të jetë shqiptar) përse nuk përfillet mërgata, a thua veç BDI ka shqiptarë të mençur dhe të ditur?!

Nëse partitë shqiptare opozitare janë udhëhequr nga interesi i përgjithshëm i qytetarëve dhe kanë treguar gatishmëri bashkëpunimi, kanë qenë korrekt dhe të sinqertë ndaj mërgatës dhe çdo qytetari, është e rrugës që në të njëjtën mënyrë të gjykojë e të veprojë edhe mërgata. Të kenë shumë kujdes nga interesat dhe lidhjet e ngushta të disa individëve me udhëheqjen aktuale të Komunës së Kërçovës dhe BDI-së në përgjithësi.

Ashtu si në të kaluarën por edhe sot e kësaj dite nëse subjekti politik që është instaluar për njëzet vjet nga ju ka kërkuar vetëm përkrahje dhe aspak nuk ju ka përfill, kësaj radhe i bie që mërgata ndikimin dhe mbështetjen e fuqishme të saj ta drejtojë drejt përkrahjes së një kandidati të opozitës ose vërtetë jopartiak. Nëse nuk arrihet kjo, atëherë mos ia mohoni të drejtën për të marrë pjesë në garë opozitës. Më shumë kandidatë nuk do të thotë humbje, por do të thotë rreth i dytë, do të thotë se pluralizmi në mendim dhe në veprim sjellë vetëm cilësi dhe dobi të përgjithshme.

Për të qenë korrekt deri në fund duhet thënë që Kërçova nuk humbet nga gara e drejtë, e lirë dhe korrekte, por ajo humbet nga keqmenaxhimi i saj dhe mos krijimi i kushteve që të rinjtë të ndalen në Kërçovë. Shpërngulja / ikja e humbë Kërçovën. Rritja e taksave (viteve të fundit llogaria për ujin, kanalizimin dhe grumbullimi i mbeturinave janë rritur katërcipërisht), papunësia, mos krijimi i kushteve për një jetë me dinjitet dhe mirëqenie e bëjnë që të humbet Kërçova.

Sigurisht që me opozitë të fortë përmirësohet pushteti prandaj pluralizmi dhe sistemi shumëpartiak janë themeli i demokracisë së një vendi si dhe parim bazë i funksionimit të shoqërive demokratike dhe të përparuara siç janë vendet ku pikërisht jetoni ju. Prandaj të shmangësh pluralizmin e veprimit do të thotë kthim në sistemin monist.

Urojmë që kësaj radhe të mbështetni koalicionin ALTERNATIVA & ALEANCA E SHQIPTARËVE të cilët ashtu si me procesin e regjistrimit, por edhe me Ligjin për shtetësi dëshmuan se janë në anën e popullit, në anën tuaj dhe kështu bashkë të arrijmë përmbushjen e amanetit të të parëve tanë duke krijuar kushte më të mira për fëmijët dhe pasardhësit, por edhe për ju që të ktheheni në vendlindje e të mos ju trajtojnë vetëm si Mërgatë (fjalën Diasporë nuk e përdori për arsye semantike), por si bijtë që dhatë gjithçka për vendlindjen dhe si pjesë e pandarë e tërësisë tonë.

Kërçovë, 26 prill 2021
ALTERNATIVA – Dega Kërçovë