Mbyllja e pjesëshme përplas për tokë biznesin..
Ekonomistët, pronorët e lokaleve gastronomike dhe qytetarët shprehen të shqetësuar për masat e reja të vendosura nga Qeveria. Sipas tyre, mbyllja mund të shkaktojë pasoja edhe më të mëdha në aktivitetin ekonomik, ndërsa si zgjidhje e shohin vaksinimin e qytetareve – ku më pastaj, do të lejohet lëvizja e lirë e të gjithë qytetareve.
Isaku, pronar i një çajtoreje në Çarshinë e Shkupit, për gazetën KOHA është shprehur se sapo kishte filluar t’i riparoj dëmet nga mbyllja e kaluar, tani merret vendimi për një mbyllje tjetër dhe se kjo është goditje edhe më e madhe për biznesin. “Qeveria gjatë muajve të kaluar nuk na ka ndihmuar mjaftueshëm dhe kjo për të gjithë ne – ka shkaktuar krizë. Mendoj se është dashur të sigurohet më shpejt vaksinimi i qytetareve që të fillojë normaliteti dhe të punojmë për ta siguruar mbijetesën”, shprehet ai.
Ndërkohë, profesori universitar Veland Ramadani, për gazetën KOHA, është shprehur se edhe përskaj optimizmit, duket se edhe ky vit nuk do të jetë i lehtë. “Kjo mbyllje do ta përkeqësojë edhe më shumë ekonominë dhe realizimin e veprimtarive afariste në kushte të tilla të limituara, ngase kjo do të ndalojë lëvizjen e lirë edhe të bizneseve – edhe të qytetarëve-konsumator potencialë. Situata është mjaftë e rëndë kur duhet të bëhet kompromis mes shëndetit dhe ekonomisë”, shprehet ai.
Ai thotë se përskaj masave të reja të Qeverisë, apo mbylljes së pjesshme, si dhe përpjekjes për zbatim të përpiktë të tyre, rolin kyç duhet ta kenë edhe vet qytetarët, të janë më të vetëdijshëm që, siç tha ai, nuk është se jemi të vetëdijshëm aq sa duhet. “Tani edhe vet qeveria është mjaft e limituar për të ndërmarrë ndonjë set të ri të masave për zbutjen e efekteve negative të pandemisë, duke konsideruar nivelin e borxhit publik aktual dhe të gjitha forcat ekzistuese duhet t’i kanalizojë vetëm në ato sektorë që drejtpërsëdrejti preken edhe më tej nga pandemia”.
Nga ana tjetër, ministri i Shëndetësisë, Venko Filipçe, duke i arsyetuar këto masa, ka pranuar se sistemi shëndetësor është i ngarkuar shumë dhe se nëse nuk vendosen masa kufizuese – do të lejohej përhapja marramendëse e virusit korona dhe autoritetet shëndetësore nuk do të arrijnë t’u japin të gjithëve ndihmën e nevojshme. “Kemi pacientë të shumtë nëpër spitale. Karakteristike është se edhe mjekimi gjatë periudhës së fundit po zgjatë më shumë se sa gjatë periudhës së vitit të kaluar. Kemi kaluar pikun dhe shpresojmë se gjatë periudhës së ardhshme do të ulet numri”, u shpreh Filipçe. Nga masat e mëparshme, mbetet në fuqi ndalesa për grupimin e më shumë se katër personave.
Numri i të vdekurve vetëm gjatë javës së fundit në Maqedoninë e Veriut, ka shkuar rreth 300 të vdekur. Deri tani, në Maqedoninë e Veriut ka pasur mbi 134 mijë persona të infektuar me virusin korona, ndërsa numri i rasteve aktive është rreth 21.000. Ndërsa numri i përgjithshëm i jetëve të humbura ka arritur afër 4000 vdekje. Ndryshe, kafenetë do të mund të kryejnë vetëm shërbime me dërgesa apo me sportele, ndërsa nga kjo masë përjashtohen objektet hotelierike në të dy aeroportet në vend, si dhe hotelet dhe motelet të cilat në restorantet e tyre do të mund t’u shërbejnë vetëm mysafirëve të tyre.
/koha.mk
