Mbrëmje letrare në Bernë kushtuar veprave të Kërçovarit Shefik Sadiku
E mërkura e 11 nëntorit, në lokalet e Bibliotekës “Qendra-5” në kryeqytetin e shtetit helvetik, ishte shndërrua në një mbrëmje tërheqëse kulturore. I tërë ambient në këtë bibliotekë ndërkulturore kësaj mbrëmje frymonte plotësisht shqip. Krahas asaj që kjo bibliotekë udhëhiqet nga një bibliotekistë shqiptare, zonja Brikela Andrea me prejardhje nga Tirana në te promovohesh veprat e një autori me prejardhje nga Kërçova.
Ndërkaq muret e sallës dhe paradhomës së kësaj biblioteke me një fond prej dhjetë mijë librash në mbi 30 gjuhë, për këtë mbrëmje ishin stolisur me pikturat e autores 19 vjeçare Nexhmije Nuhija. Në mesin e shqiptarëve artdashës, me prejardhje nga viset e ndryshme, pati mërgimtarë edhe nga kantone tjera zvicerane ishte edhe mikesha e shqiptarëve, zonja Paulina Müller, koreografe e valleve ballkanike, ndonëse në moshë rreth 80- vjeçe.
Mbrëmjen në cilësinë e organizatores dhe njëherësh edhe të nikoqires e hapi drejtuesja e kësaj biblioteke Brikela Andrea, e cila pasi që i bëri një përshkrim punës së bibliotekës dhe veprimtarisë së saj kulturore e integruese, prezantoi poetin Shefik Sadiku, përmes një fjale kushtuar jetës dhe veprimtarisë së tij artistike .
Nga fjala e rastit e drejtueses së kësaj biblioteke, Brikela Andrea, mësohet se autori, katër librat e të cilit ishin në qendër të vëmendjes, poeti Shefik Sadiku, është i lindur në fshatin Kodrishtë sot Strellcë të komunës së Kërçovës, ku edhe ka kryer shkollën fillore ndërsa të mesmen në Prishtinë. Në pamundësi për të vazhduar studimet për shkaqe ekonomike por edhe rrethana politike migron në Zvicër. Nga shkaqet ekonomike-politike, si i ri detyrohet të braktis atdheun.
Ndërsa sa i përket prirjes së tij në fushën e letërsisë, Shefik Sadiku, fillon të shquhet qysh në bankat e shkollës fillore dhe gjatë periudhës së mëvonshme. Shkrimet e para të zhanreve të ndryshme letrare i boton në gazetat dhe revistat e Kërçovës, Prishtinës, Shkupit dhe më vonë edhe në Tiranë. Aktualisht është anëtar i Shoqatës së Shkrimtarëve Shqiptarë në Zvicër. Ndërkaq, jeton dhe vepron në Bernë.
Prezantuesja e veprimtarisë së Shefikut, përmendi se e tërë krijimtaria e këtij poeti që përmblidhet në pesë vepra, kryesisht në poezi paraqet një fryt pune të palodhshme të këtij autori për letërsinë tonë. Në krijimtarinë e tij shquhet tematike për bashkimin kombëtar, gjuhën dhe trojeve të bukura shqiptare me viset e tyre magjepse. Deri më tash Shefiku ka botuar këto libra; 1.- “Abetarja e tokës shqiptare”… Shkup, poezi, 2.-“Shqipëria kopsht i perëndisë” …Kërçovë… poezi, 3.-“Veroret”… Kërçovë, poezi, 4.-“Shqiptarët zanafillën e kanë këtu”…Kërçovë, monografi dhe 5.- “Valët e jetës”… Kërçovë… poezi.
Pjesë sa simbolike aq edhe freskuese e artistike e kësaj mbrëmjeje ishte prania e disa të rejave dhe të rinjve, kryesisht nxënës e studentë por edhe punëtorë të ri që jetojnë e veprojnë në Bernë me rrethinë. Ndërsa kulmi i kësaj bukurie, ishin pikturat e vajzës 19 vjeçare, përplot prirje e talent, Nexhmije Nuhija, e cila ndonëse ka kryer një shkollë ekonomike, pikturimi i fle në zemër dhe arrin ta dëshmojë këtë me shumë zell e përkushtim artistik.
Me këtë rast organizatorja e këtij evenimenti kulturor, Brikela Andrea, zhvilloi një bashkëbisedim interesant për rrugëtimin artistik të kësaj piktoreje me perspektivë. Niveli i përgjigjeve me një gjuhë të pastër shqipe nga piktorja e re ishte edhe një dëshmi se shumica e të reja tona ndonëse kanë ardhur si fëmijë në Zvicër apo edhe kanë lindur këtu, megjithatë zotërojnë një shqipe të lakmueshme. Fjalë admiruese në ketë mbrëmje për këtë piktore të re, pos të tjerëve pati edhe piktorja nga Ulqini, me banim në Bazel, Lirije Kordiqi.
Ishte ky rast i mirë që kësaj biblioteke që posedon një numër të mirë të librit shqip të ia dhuroj librin “Shqiptarët në Zvicër- 1001 pamje”, si edhe piktores së re Nexhmije Nuhija.
/prointegra
