Mungojnë dasmat, përgjysmohet puna e artarive..

Pronarët e sallave për dasma, pagëzime dhe festime të tjera kërkojnë që Qeveria të heqë ndalimin e punës së tyre dhe të miratojë një protokoll për kryerjen e aktivitetit të tyre para sezonit të dasmave. Ata i bëjnë apel Qeverisë që të mos mbajë pezull mijëra të fejuar edhe gjatë këtij sezoni, sikurse vitin e kaluar. Pronarët paralajmëruan se do të bëjnë protestë javën tjetër nëse nuk marrin një përgjigje pozitive dhe kërkesat e tyre nuk pranohen.

“Ne kërkojmë heqjen e menjëhershme të nenit 14 të Dekretit të botuar në Gazetën Zyrtare më 23 qershor vitin e kaluar, i cili ndalon organizimin e çdo lloj ngjarjeje (dasma, ditëlindje, ahengje), në një pjesë të hapur dhe të mbyllur të objektit. Si ambiente hotelierike, ne i bëjmë apel Qeverisë të mos mbajë në pezull mijëra të porsamartuar këtë sezon, si sezonin e mëparshëm. Le të parandalojmë një përsëritje të mosveprimit të vitit të kaluar, ku të porsamartuarit u detyruan të bënin ceremonitë e tyre të dasmave në oborret e tyre dhe vilat e marra me qira, pa patur mundësinë për të zbatuar Protokollin e duhur në distancë dhe pa kushtet e nevojshme higjieno-sanitare”, u shprehën ata.

Pronarët sigurojnë se ata posedojnë kapacitete të mëdha, sipërfaqe të përshtatshme dhe mundësinë për të kryer një ngjarje të organizuar që do të ishte në përputhje me të gjitha protokollet e miratuara tashmë dhe sipas të cilave veprojnë restorantet e tjera me orar të kufizuar. “Ne jemi operatorët e vetëm ekonomikë që kemi një ndalim 11 mujor të punës dhe kemi përdorur ndihmën e pjesshme shtetërore për të mbështetur pagat dhe kontributet, e cila zgjati vetëm gjashtë muaj”, thanë pronarët. Krahasuar me rajonin, shtojnë ata, jemi i vetmi vend që nuk ka marrë një Protokoll për ngjarje të organizuara, dhe mbështetja e subvencionimit të pagave dhe kontributeve, si dhe granti i një hershëm – është dukshëm si ndihma më e ulët e drejtpërdrejtë për sektorin tonë në rajon.

Nga Sektori Hotelerisë në Ministrinë e Ekonomisë thonë se janë në përpilim e sipër të një Protokolli, që 133 sallat e dasmave të regjistruara në vend, të mund të punojnë në kushte optimale gjatë sezonit. “Në bazë të sektorit privat, varësisht prej kapacitetit të restoranteve – mund të organizohen edhe dasma të mëdha, por edhe dasma me numër më të vogël të mysafirëve. Në Protokoll do të parashihen katër persona në një tavolinë, me 2 metra distancë. Kemi restorante shumë të mëdha që mund të pranojnë madje deri 500 mysafirë pa i shkelur masat anti-Kovid”, deklaroi Bekim Haxhiu nga Sektori i Hotelerisë dhe Turizmit.

Kurse nga Oda e Gastronomëve kërkojnë që protokollet për organizimin e manifestimeve në ambiente të mbyllura të bëhen sa më shpejtë. Kreu i kësaj Ode tha se për organizimin e dasmave, gastronomët do të pranojnë të punojnë me gjysmën e mysafirëve dhe orar të reduktuar. “Kjo që për momentin është urgjencë e domosdoshme, është informacionet që duhet të dinë qytetarët që janë të interesuar të bëjnë manifestime, se në çfarë mënyre dhe si do të zbatohen masat. Për dasmat, ditëlindje apo ahengje të tjera, duhet patjetër të ulemi në një tryezë të përbashkët me Komisionin për sëmundje infektive dhe përfaqësues tjerë qeveritare dhe të kontribuojmë në sjelljen e protokolleve tani menjëherë, që të mund gjatë sezonit të mos kemi keqkuptime”, thotë Martin Angellovski, kryetar i Odës së Gastronomeve.

PËRGJYSMOHET PUNA E ARTARIVE

Përveç problemeve gastronomike, dëme të mëdha kanë edhe artaritë, të cilët gjatë sezonit të kaluar dasmave, kanë shënuar humbje të mëdha. Kriza e pandemisë dhe masat e sjella nga Qeveria, thonë pronarët e artarive, nuk e ka kursyer edhe këtë biznes që drejtpërdrejt është i lidhur me hotelierët.

Burhan Xhemaili, pronar i një prej artarive në Çarshinë e Shkupit, për gazetën KOHA rrëfen për periudhën e fundit në zhvillimin e biznesit të tij privat. “Përgjatë periudhës së koronës, kemi pasur disa pako ekonomike ose më mirë të themi – ndihmë nga ana e shtetit, por kjo ndihmë ka qenë e pamjaftueshme për artaritë. Fitimet dhe shitja e arit vitin e kaluar është përgjysmuar krahasuar me vitet para pandemisë. Nuk është se nuk ka interesim këtë vit, por siç e dimë – pikëpyetje se a do të mbahen dasmat edhe këtë vit. Na kanë informuar se gjatë muajit të ardhshëm do të ketë prapë ndihmë shtesë nga Qeveria, por akoma po presim, duke shpresuar që do të bëhet më mirë”, thekson Xhemaili.

Edhe artarë tjerë ankohen se floriri nuk shitet si më parë. Çmimet nuk kanë lëvizur, megjithatë pronarët e artarive thonë se është përgjysmuar edhe numri i dasmave. “Dhe pa dasëm, nuk shitet as floriri, as mishi e as nuk ka gëzim”, thotë shkurt një pronar i artarisë në Çarshinë e Shkupit. Ndryshe, derisa institucionet po përballen me organizimin ilegal të dasmave, shumë familje ndërkohë kanë nisur rezervimin e dasmave në restorante për vitin e ardhshëm, me shpresë se gjendja do të stabilizohet dhe më këtë do të hiqej edhe ndalesa për organizimin e tyre në restorante.

/koha.mk