“Derisa ia ka dhënë dozën tjetër, çikën e ka lëshu trupi”, rrëfimi i nënës së 7-vjeçares që vdiq..

Në gusht të vitit të kaluar, Lutfie Haxhiu kishte dërguar vajzën e saj 7-vjeçare, Tuana Haxhiun, në një poliklinikë në Prishtinë për të kryer një ekzaminim magnetik ndërsa komplikimet shëndetësore gjatë rezonancës nxorën Tuanën nga klinika pa shenja jete.
Nëna e 7-vjeçares ka rrëfyer rastin që nga fillimi ndërsa herë pas here kur kujton ngjarjen ajo nis dhe qan.
Vajzën, nëna e kishte dërguar në njërin nga mëngjeset e gushtit të 2020-ës për të kryer një ekzaminim mjekësor.

Siç rrëfen Lutfie Haxhiu kishte biseduar në telefon për termin me doktorin Arben Kutllovcin ndërsa i njëjti i kishte thënë që të shkojnë në klinikë të nesërmen për të kryer ekzaminimin.

“Një ditë përpara kam bisedu me doktor Arben Kutllovcin e kam lënë terminin për të nesërmen. Ai më ka thënë prej orës 16:00 ndërsa i thash që s’mundem vajzën me lënë deri në ora 16:00 pa termin pastaj me ka thirrë më ka thënë hajde të nesërmen në ora 9:00. Ka pasë me bo rezonancën. E kam pyet mjekun a janë krejt mjetet e mjekësisë edhe pse se dija çka duhet me pasë aty edhe thash duhet me qenë aty dhe gjitha mjetet edhe mos me u vonu që prej 9:00 me qenë e gatshme që mos me lënë çikën me pritë”, rrëfen Haxhiu deri sa shton se kishte kërkuar nga doktori Kutllovci që të dijë në lidhje me të gjitha pajisjet mjekësore të cilat i posedonin për të kryer rezonancën.

Lutfia Haxhiu rrëfen tutje se kishte pritur për 30 minuta në poliklinikë deri sa ka ardhë edhe anesteziologu dhe ka filluar që t’i japë dozën e qetësimit 7-vjeçares.

Haxhiu thotë se anesteziologu Alban Gjonbalaj nuk i kishte kryer matjet e peshës së vajzës ndërsa i ka dhënë dozat e qetësimit 7-vjeçares. Këto veprime më pas ngrisin dyshime te nëna e vajzës.

“Alban Gjonbalaj ka qenë edhe pse unë për herë të parë aty e kam parë. E ka shti në dhomë, ia ka ngjit kanillën edhe ia ka dhanë një lugë me surup edhe kur ia ka dhënë lugën me surup vajza menjëherë e ka lëshu kokën. Edhe i thash doktorit pse aq shpejt edhe i metën sytë hapun, tha: Tash i mbyll. Kur ia ka dhanë edhe shiringun në kanillë më ka thënë tash i mbyll po prapë çika nuk i ka mbyll sytë. Vajza aty as nuk ka qenë e lidhur edhe s’ka pasur asnjë aparat të ngjitun që me përcjell qysh po i shkon gjendja”, vazhdon të tregojë Haxhiu për ditën kritike.

Ajo vazhdon rrëfimin duke thënë se pas disa minutave doktori ka vrapuar drejt dhomës ku po kryhej rezonanca ndërsa pas tij edhe nëna e Tuanës.
“Pas 30 minutave e kam pa doktorin ka vrapu edhe unë kam vrapu para doktorit, e ka hap derën e kam pa vajzën kish qenë ulun edhe doktori shkoi me ia dhënë prapë dozën e njëjtë. Unë kam vrapu e kam kap vajzën se jam tutë mos po bjen poshtë. S’ka pasë kohë me vetë, ai sa mujke u ngutke me ia dhanë tjetrën dozë. Si ia ka dhanë dozën tjetër, ajo veç e ka lëshu trupin”, vazhdon të tregojë Lutfie Haxhiu.

Dyshimet se diçka nuk është në rregull filloi t’i ngris pasi vajza mori edhe dozën tjetër të qetësimit.
“Për momentin e ka lëshu trupi, e pyta doktorin pse aq shpejt e lëshoi trupin dhe kokën po doktori nuk më dha përgjigje edhe herën e dytë qashtu. Kam nejtë mas 30 minuta kur e kryjti vajza u çu u ul, kam nejt edhe 5 minuta ulur, mu ka dokë që po e ni një za edhe kam vrapu i kam thanë doktor: Po m’doket si zë edhe mu ka drejtu: Kush të tha. Edhe më nuk kam bërë zë, prapë u ula qaty pritsha kur u bo 20 minuta i kam pa doktorët tuj nga, edhe unë mbas tyne. Kur jam hy e kam pa doktorin e ka prek të qafa e tha njëfarë fjale të pakuptueshme që çka paska ndodh edhe menjëherë ka fillu me i dhënë frymëmarrje”, tregon ajo tutje ndërsa shtoi se është lajmëruar ndihma e shpejtë për të marrë 7-vjeçaren.

Lutfie Haxhiu hodhi poshtë pretendimet e dokumenteve se ndihma e shpejtë kishte shkuar në poliklinikë për 7 minuta.
Sipas saj, ndihma shpejtë është vonuar 30 minuta apo edhe më shumë.

“S’ka pas shans me ardh mas 7 minutave. Ndihma e shpejtë ka ardhë mas 30 minutave. Ndërkohë e kanë thirrë doktor Arbenin, e unë dikur nuk kisha fuqi, E pyeta: A i erdh fryma? Doktorit më tha: jo… Doktor Gjonbalaj i rrudhi krahtë kishe që jo. Edhe ndihma e shpejtë i pruni pegllat dhe janë mundu me ato po na vajzën e pamë që filloi me u nxi, me ju fry barku. Ajo aty ka mbet pa frymë”, ka thënë Haxhiu për Kallxo.com

/kallxo