Kërçovë: Qentë endacak, rrezik permanent për qytetarët..

Qentë endacak, përbëjnë rrezik permanent për qytetarët. Numri i tyre dita-ditës po shtohet, ndërkohë që mungojnë masat adekuate e komunës së Kërçovës për trajtimin e tyre.
Viteve të fundit është shtuar dukshëm numri i qenve endacak në hapësirat ruarale dhe në ato urbane. Ata i vërejmë kudo nëpër rrugët e qytetit dhe tanimë janë shëndërruar në një rrezik potencial për banorët vendor, e sidomos për fëmijët.

Ankesat e qytetarëve për këto rreziqe që i paraqesin qentë endacak janë të shpeshta. Janë të shumta edhe procedurat gjyqësore që janë hapur për dëmet e shkaktuara nga kafshimet e qenëve. Si pasojë e këtyre lëndimeve gjatë viteve të fundit, komuna e Kërçovës ka paguar kompenzimet për lëndimet e shkaktuara sipas vendimeve të caktuara në procese gjyqësore.

Për këto shqetsime të banorëve vendor, komuna e Kërçovës nuk i ka marrë masat e duhura që do të ndikonin në uljen e këtyre rreziqeve nga qentë endacak. Numri i tyre dita-ditës rritet, ndërsa administrata komunale tregohet e pa aftë në përballje me këtë sfidë që përbën rrezik për shëndetin e popullatës vendore.

Mbase, këtij institucioni i kanë munguar edhe përpjekjet minimale për të tejkaluar këtë situatë të rënduar. Dhe në mungesë të kapacitetit sfidues ndaj kësaj dukurie shqetsuese, komuna e Kërçovës vetëm ushqen shpresën e ndihmës qeveritare për tejkalimin e kësaj situate.

Duke pasur parasyshë se komuna e Kërçovës nuk ka ndërmarrë thuajse asgjë, ne jemi të detyruar që të fillojmë në mënyrë të pavarur përpjekjet për zgjidhjen e këtij problemi, thotë Snezhana Vasileska, anëtare e shoqatës Grifon. Kërkuam ndihmë nga kryetari i komunës, e gjetëm lokacionin me çmim të volitshëm për vendosjen dhe vaksinimin e tyre.

Ai na premtoi ndihmën e tij për krijimin e kushteve të përshtatshme por këto premtime të përsëritura në vazhdimësi që nga viti 2018, mbetën vetëm fjalë boshe të njeriut të parë të komunës, nënvizon ajo.

/tvpollogu