Maqedonia vërshohet me euro të falsifikuara, “fabrika e Tetovës”i prodhon me kualitet të lartë..?!
Qytetarët duhet të jenë më të kujdesshëm këtyre ditëve kur kanë punë me euro. Që nga pjesa e dytë e vitit të kaluar vendi është vërshuar me bankënota të eurove të falsifikuara edhe atë të gjitha llojeve-50, 100 dhe 500 euro.
Nuk dihet nëse gjitha eurot e falsifikuara vijnë nga “fabrika e Tetovës” për prodhim të parave të falsifikuara, mirëpo si duket ato janë të kualitetit të lartë, sepse qytetarët nuk i dallojnë as kur i pranojnë për pagesë ose shkëmbim në sasi të mëdha, shkruan gazeta Lajm.
Për “fabrikën e Tetovës” për para të falsifikuara fillimisht raportoi “Alsat”. Burimet e këtij televizioni brenda grupit hetimor kanë bë të ditur se paratë e kapura të falsifikuara më 27 janar në një kazino të Kumanovës, krijojnë pista hetimi në rajonin e Tetovës ku dyshohet për një punëtori e cila jo pak bankënota ka lëshuar në përdorim. Informacionet e fundit të cilat po i përpunon policia lidhen me ngjarjen e 22 janarit, kur pak minuta para mesnate personat e dyshuar nga Kumanova kanë marr një shumë parash nga një person në afërsi të pikës pagesore në Zhelinë.
Para ka marr edhe një shtetas nga Kosova identiteti i të cilit akoma nuk është bërë i njohur për policinë. E gjitha që i është thënë policisë është fakti se paratë janë marr nga një person me veturë të tipit Audi rreth orës 22 në afërsi të Tetovës. Në treg janë lëshuar kryesisht bankënota 50 dhe 100 euro.
Ndërkohë dje Sektori për Punë të Brendshme-Tetovë ka ngritur padi penale kundër personit I.A. (45) nga Shipkovica e Tetovës dhe B.E. (48) nga Leshnica e Poshtme e Tetovës deri në Prokurorinë Themelore Publike Tetovë për shkak të dyshimit se të njëjtit kishin kryer vepër penale “falsifikim të parave” që është e dënueshme në bazë të nenit 268, paragrafi 2 i Kodit Penal.
Rast tjetër është shënuar edhe në Shipkovicë, kur vetura është paguar me euro të falsifikuara
“Personi i raportuar I.A. dyshohet se në shtator të vitit të kaluar nga B.E. Ka blerë një veturë “BMË” dhe të njëjtën e kishte paguar me 4500 euro të falsifikuara, kurse personi B.E., megjithëse e kishte ditur që kartëmonedhat ishin të falsifikuara, nuk i kishte raportuar ato dhe në disa raste ishte përpjekur që t’i hidhte në treg”, thuhet në njoftimin e policisë.
Paratë e falsifikuara kryesisht janë bankënota 50 dhe 100 euro. Po ka raste kur policia zbulon dhe bankënota të falsifikuara në vlerë 500 euro.
Rast i tillë është shënuar më 26 nëntor kur një vajzë 24 vjeçare nga Kratova, me iniciale M.F., në një kazino në Shkup ka lëshuar në qarkullim 2 kartëmonedha me nga 500 euro, gjegjësisht ka bërë ndërrimin e tyre me denarë dhe në këtë mënyrë ka kryer vepër penale, thuhet në njoftimin e policisë”.
Sipas Kodit Penal, përpunimi, lëshimi dhe përdorimi i parave të falsifikuara dënohet nga 1-10 vite burg, ndërsa në masë efektive përfshihet edhe personi fizik apo subjekti i cili ka pranuar të njëjtat dhe nuk i ka denoncuar.
/lajmpress
