Kërçovë: Keqpërdorimi i 300.000 eurove në Llapushnik..! (VIDEO)

Ka mbetur nën hije çështja e dëmit prej 300.000 eurove që i është bërë Ndërmarrjes Publike “Llapushnik” në Kërçovë për të cilën TV21 raportoi ditë më parë.
Në raportin e fundit të Euro Think në lidhje me prerjen ilegale të drunjve thuhet se Ndërmarrja Publike “Llapushnik” është dëmtuar shumë dhe në këtë janë të përfshirë krerët e kësaj ndërmarrje dhe disa të punësuar.

TV21 mësoi se më 21 shkurt të vitit të kaluar është ngritur padi penale për keqpërdorim të pozitës zyrtare kundër personit Zoran Krsteski 61 vjeç dhe kundër dy personave të tjerë nga fshati Pllasnicë SH.A 51 vjeç dhe B.B 39 vjeç të punësuar tek Ndërmarrja “Llapushnik”.
Për këtë rast Lupço Nikolloski, zv/kryeministër për Luftën Kundër Korrupsionit tha se po ndërmerren të gjitha masat por pa dhënë detaje konkrete.

“Për rastin në fjalë janë duke u ndërmarrë të gjitha masat ligjore të cilat i ka Ministria për Punë të Brendshme , puna jonë është koordinuese, sistematike, një herë i hapim pyetjet, hapim problemet të cilat deri më tani askush nuk ka dashur të hyjë dhe ti zgjidhë për këtë kemi marrë mbështetje edhe nga qytetarët”, tha Lupço Nikolloski – Zëvendëskryeministër për luftën kundër korrupsionit.

Por edhe pse ka kaluar një vit që kur është ngritur kjo padi penale nga MPB-ja, nga Gjykata e Kërçovës thonë se atje nuk ka asnjë informacion në lidhje me këtë rast.

“Lidhur me pyetjen tuaj nëse është ngritur procedurë penale kundër drejtorit të filialit “Llapushnik” në Kërçovë dhe dy të punësuarve të tjerë në këtë ndërmarrje. Ju njoftojmë se pas kontrollit në sektorin penal u konstatua se nuk ka të regjistruar lëndë penale për personat e lartpërmendur”, thonë nga Gjykata e Kërçovës.

Ditë më parë ne kontaktuam kreun e filialit “Llapushnik“ Kërçovë Zoran Kërsteski , por ai hodhi poshtë këto akuza duke pretenduar se bëhet fjalë për dëmin që prerësit ilegal i kanë bërë ndërmarrjes. Ai mohon akuzat se janë të përfshirë në korrupsion.

“Nuk ka asgjë të vërtetuar, as të vendosur, mbi të punësuarit. Ndërsa dëmi që është sjellë është dëm nga vjedhjet e pyjeve. Nga fillimi do të shqyrtohet në prokurori a ka të përfshirë apo nuk ka”, potencoi Zoran Kërsteski.

Hulumtimet e fundit të EuroThink shpalosën të dhënat nga viti 2010 deri në vitin 2019 nga ku tregojnë se bëhet fjalë për veprimtari të organizuar kriminale ku grupe serioze kriminale me hierarki dhe strukturë arrijnë të akumulojnë një sasi të madhe të prerjeve të egra ilegalisht. Ata thonë se në këtë veprimtari ilegale janë të kyçur edhe figura të fuqishme politike.

Në raportin e fundit të EuroThink flitet për dëmin e një shumë prej 300.000 mijë eurove që i është bërë filialit “Llapushnik “ Kërçovë për shkak të keqpërdorimit të pozitës zyrtare për një drejtor dhe disa të punësuar.

VIDEO:

/tv21