Kërçovari nga SHBA: Sot është inaugurimi, një ditë historike, Urime Presidenti Biden

Sot ik me turp ish-Presidenti që i vuri flakën nervit të demokracisë në Kapitol Hill. Ai sot nuk do të jetë te shkallët e Kapitolit për një transferim paqësor të pushtetit. Ai iku me bisht nën shalë, ashtu si ikin fajtorët dhe humbësit e turpëruar keq. Sot, kryeqyteti u gëdhi i blinduar, i plagosur fort nga aktet barbare të përkrahësve të ish-Presidentit Trump.

Zoti ish-President Trump, sot Amerika feston, sepse vota masive e theu rekordin në zgjedhjet presidenciale amerikane, ta dha verdiktin e merituar, të ikni, sepse ju nuk ditët të menaxhoni, as marrëdhëniet etnike, as ato racore, as pandeminë, e as marrëdhëniet ndërkombëtare. Po, Ju ikni me një votë plebishitare jashtë Shtëpisë së Bardhe, në shenjë zemërimi e proteste nga votuesi, sepse ju shpesh zjarrit i hodhët benzinë, dhe ky është verdikti i sovranit.

Sot, përfundoi epoka juaj e abuzimit me shtetin e me pushtetin, me aleatet, e tërë botën. Sot, Amerika shpëtoi nga arroganca juaj, cinizmi dhe nga skenat e pakëndshme që krijove shpesh në vend dhe jashtë. Lamtumirë ish-Presidenti im i çuditshëm, sot populli ka një ndenje lehtësimi e shpëtimi nga sjelljet tuaja arrogante prej një autokrati.

Ju, manipuluat edhe me situatën e vendit tim të origjinës, një vend i vogël, i vuajtur e paqësor që e krijoi Amerika, me bombardimet që i sponsorizoi kundërshtari juaj politik, Joe Biden, dhe miku i tij republikan, Senatori McCain, që shpëtuan popullin tim nga gjenocidi dhe zhdukja. Derisa, Biden ka merita të veçanta për çlirimin e vendit të rrënjëve të mia, Ju si një diletant pa fije turpi u munduat ta përvetësoni aktin e Biden-it gjatë fushatës elektorale.

Lamtumirë ish-Presidenti Trump, Ju, në kohë pandemie lejuat që i dërguari juaj special për Kosovë e Serbi, Ambasadori Grenell, të rrezojë qeverinë legjitime dhe të instaloj një qeveri kukull, ku do t’u përgjigjej kërkesave të Grenell-it e Vuçiqit, në dëm të interesave kosovare. Ishte skandaloze kur e barazuat agresorin me viktimën, duke e përbuzur karakterin laik të Kosovës, bilës edhe duke ia ndërruar historinë dhe gjeografinë nga diletantizmi
dhe padituria juaj.

Fatmirësisht, ju ikët si një humbës i madh, pa arritur të realizoni asnjë marrëveshje, dhe pa realizuar ëndrrën tuaj që Ujmani të quhet, Liqeni Trump dhe pa çmimin “Nobel”. Padyshim, se ikja juaj i ka dëshpëruar miqtë tuaj në Serbi dhe disa pushtetarë në Kosovë.
Lamtumirë ish-Presidenti im arrogant, që i lartësove diktatorët dhe i poshtërove aleatët tanë, anembanë botës. Kërkove, që kundërshtari juaj politik, Joe Biden të burgoset, kërkove nga një lider i huaj që Biden të hetohet, duke e shkelur kushtetutën e vendit me dy këmbë.

Lamtumirë ish-Presidenti i mureve ndarëse, që emigrantët i quajtët dhunues, vrasës, i ndave fëmijët nga prindit, krijove sloganin ‘America first’ fatkeqësisht, ky veprim u shndërrua në një ritual ‘Amerika vetëm’, e izoluar e pa miq tradicional.
Ju shpejtë e harruat, si një emigrant i gjeneratës së dytë, kur nëna juaj emigroi në Amerikë, paraardhësit tuaj nuk e ndaluan në kufi, ajo e jetoi ëndrrën amerikane që djali i saj, ju zoti president, të bëheni i pari i këtij vendi, fal zemërgjerësisë amerikane. Ju harruat që në fakt, ne jemi një shtet emigrantësh, i vetmi në botë, ku emigrantët ndihen të lirë, ashtu si ju, që realizuat ëndrrën amerikane, por këtë ëndërr Ju ua mohoni emigrantëve të ri.

Lamtumirë z. Trump, i urryer fort edhe nga familja juaj e ngushtë, nga motra juaj që i tha the Washington Post se “vëllai im (Trump) nuk ka principe”, derisa mbesa juaj e titulloi librin e saj kushtuar ju me titull rrëqethës “…Si e krijoi familja ime njeriun më të rrezikshëm në botë”.
Lamtumirë ish-Presidenti im ‘aksidental’, që i poshtërove bashkëpunëtorët, dhe i largove njerëzit që të sollën në pushtet, ju qëndruat nën hijen e Putinit dhe kurrë nuk i denoncove diktatoret dhe liderët ultra-supremacistë., Ju z. ish-President, me diskursin tuaj ofendues, degjeneruat partinë duke e detyruar atë që të sillet rreth orbitit të kultit të degjeneruar Trump.

Lamtumire z. Ish-President Trump, ik, merre djalin, vajzën, dhëndrin me vete, sepse e abuzuat zyrën ovale kot, ik sepse Amerika dhe bota pa ju është me e sigurte, ikja juaj është një proces demokratik shume i mirëpritur. Ik, sepse Ju pa fije turpi luajtët valsin e fundit “me shkrepës te ndezur rreth fuçisë me barut”.
Sot, është një dite historike, një dite e lumtur dhe me fat për Amerikën, sepse juve ju zëvendësoi Presidenti Biden, fitorja e tij ngazëlleu vendin dhe boten, sepse Presidenti Biden është një pasardhës i denje i baballarëve te kombit.

Ramazan Bekteshi, Alexandria, Virginia, USA