Kërçova, e para me mjekë shqiptarë në Zvicër
As vet nuk e di, pse aq shumë impresionohem kur takohem me ndonjë kërçovar, por vetëm e di se kjo ka një lidhje të hershme, qysh nga femëria ime e hershme derisa jetoja në Shkup, kur atje ende nuk kishte ndodh as tërmeti katastrofal .
Atëbotë për Kërçovën, mësova përmes këngëve karakteristike që këndonte grupi i njohur, Trio Zajazi, në një minutazh vetëm prej 15 minutave në javë sa kishte çdo të hëne Radio Shkupi. Turi Zajazi përbëhej nga vëllezërit Zajazi e Gani Grubi. Derisa Rexhep Zajazi, solisti i parë i këtij grupi, ishte njëherësh edhe drejtor i ndërmarrjes së pastrimit të qytetit të Shkupit, ku shqiptaret e kishin të vetmen mundësi e “privilegj” për punësim! Kështu që, Rexhep Zajazi gëzonte një autoritet të dyfishtë në shumë familje shqiptare, edhe si drejtor por edhe si këngëtar.
Por me ardhjen time në Zvicër arrita të mësoj se numri i kurbetçinjve nga Kërçova në Zvicër ishte tejet i madh dhe se shquheshin edhe me një organizim të mirë, përmes shoqatës së tyre “Kërçova” që edhe këtu në shtetin helvetik kultivon program me ngjyrim autokton, si në veshje, këngë e interpretim, madje edhe këngë të trashëguara nga vet Trio- Zajazi, që mu kishin ngulit në kokë diku 6 dekada më parë!
Por ajo që më la veçmas përshtypje ishte numri i studentëve me prejardhje nga Kërçova këtu në Zvicër, sidomos në mjekësi, të cilët brenda pak vitesh në saje të angazhimit, vetmohit dhe përpjekjeve për dije e kërkime shkencore arritën të bëhen emra të njohur në ordinanca, spitale, ambulanca private e madje edhe si ligjërues universitarë.
Në një rast në një tubim, kur shoqata “kërcova” deshi të më nderoj me një mirënjohje për shkrimet që i dedikoja, krejt spontanisht kërkova që të më shoqëroni përmes një fotoje të përbashkët mjekët dhe mjeket me prejardhje nga Kërçova në Zvicër dhe sakaq patëm një foto brenda një kornize, filluar nga doktori i ri Faik Elezi, kirurg i përgjithshëm dhe trauamatolog; Lana Xhambazi, specializante ne mjekësi interne, Florim Cuculi, kardiolog me emër, drejtues në Klinikën “Cardio Center Luzern”, Gafurr Sherbeti (psikiatër), Florije Jusufi (anesteziste) dhe Bekim Elezi ( ky gjinekolog në Maqedoni), si dhe me zonjë Shukrije Ramdadani, gruan e hero Agim Ramadanit , drejtuese e Qendrës kulturore të Republikës së Kosovës në Cyrih. Atë ditë në atë manifestim , munguan mjekët nga Kërçova që gjithashtu jetojnë dhe punojnë në Zvicër, siç janë: Arben Xhambazi, specializant ne kirurgji torakale në Aarau, Perparim Limani, kirurg viszeral dhe Mefail Mexhiti, psikiater Biel/Bien.
Vërtetë është kënaqësi që vetëm nga një komunë mesatare nga Maqedonia e Veriut të kemi kaq shumë mjekë shqiptarë në Zvicër, për të iu bashkuar armatës së rreth 400 mjekëve shqiptarë sa ka aktualisht në shtetin helvetik e që përbëjnë një nga shtyllat kryesore të mbrojtjes shëndetësore në Zvicër, duke u vu disa nga ta edhe në krye të pavijoneve e klinikave apo edhe të reparteve spitalore dhe jo vetëm kaq por edhe duke qenë të vetmit mjek në disa lokalitetet më të vogla të banuara kryesisht me popullsi vendase.
E gjithë kjo flet jo vetëm për arritjen e komunitetit të madh në Zvicër, por edhe për arritjen e reputacionit dhe imazhit të mirë që i shtojnë vetë pranisë sonë të madhe në këtë shtet të zhvilluar.
Kur kësaj i shtojmë edhe pranin e qindra e qindra infermierëve e infermiereve shqiptare dhe personelit ndihmës, shohim se shqiptarët në Zvicër përbëjnë një kapitull arritjesh në fushën e shëndetësisë, kryesisht në dy-tri dekadat e fundit, duke u bërë faktor i rëndësishëm preventive përgjatë kësaj periudhe në kushtet e rënduara nga pandemia, që ka plandos shumë vende të botës.
Krejt në fund do theksuar edhe një karakteristikë për mërgatën e Kërçovës, apo siç thuhet të regjionit të Toskanës, se sa është e lidhur me vendlindje, por edhe vet vendlindja konkretisht komuna është e lidhur me mëgatën. Nuk kam pa asnjë takim të mbajtur në Zvicer e të mos vjen kryetari i komunës Fatmir Dehari me një ekip nga kreu komunal e duke u sjell aq me afërsi sa edhe ti veshin fanellat sportive për të dalë në fushë në një lojë të përbashkët futbolli!
Pra kjo është Kërçova dhe mërgata e saj shembullore në shtetin helvetik, ndaj edhe të tjerët mund ta marrin si model ngase vetëm mund të përfitojnë e prosperojnë!
/prointegra
