Nuhiu dhe Cuculi më të mirët në futbollin Kosovar

Trajneri shkupjan Ardian Nuhiu dhe mbrojtësi kërçovarë Ardian Cuculi janë fituesit e çmimit si më të mirët në futbollit kosovar të zgjedhur nga redaksia e sporti në portalin Telegrafi. Për të tretin vit radhazi, ky portal ndan çmimet për portierin, mbrojtësin, mesfushorin, sulmuesin dhe lojtarin e vitit, ndërsa këtë herë ka ndarë çmimin edhe për trajnerin e vitit si dhe lojtarin më të talentuar të vitit në Superligën e Kosovës në futboll.

Ardian Nuhiu padyshim se është trajneri më i mirë i vitit pas sukseseve të mëdha me klubin e Dritës. Fitimi i titullit kampion në sezonin 2019/20 dhe shpallje kampion vjeshtor në sezonin aktual 2020/21 e vërtetojnë epitetin e më të mirit për trajnerin Nuhiu.

Përveç kësaj, trajneri shkupjan ka sjell edhe një kulturë të lartë sportive në ndeshje dhe deklaratat e tij të matura pas ndeshjeve. 24 fitore, 6 barazime dhe 4 humbje janë bilanci i Nuhiut si trajner në vitin kalendarik 2020.

Ai kishte nga 12 fitore në secilën prej dy gjysmë-sezoneve. Ai në Evropë gjithashtu pati sukses duke arritur të marrë dy fitore, por edhe dy humbje, ku njëra nga to erdhi në tavolinë shkaku i rasteve me COVID-19 në skuadër. Drita si kampione e Kosovës është dalluar më së shumti në repartin e mbrojtjes, ku thuajse ishin të pathyeshëm.

E padyshim që loja e mirë në defensivë te Drita ka bërë që Ardian Cuculi të zgjidhet mbrojtësi i vitit. Qendërmbrojtësi nga Kërçova ka qenë lider i vërtetë tek skuadra e Dritës.

Cuculi ka marrë një nofkë interesante nga tifozët e Dritës si ‘Ministri i mbrojtjes’ falë ndeshjeve fantastike që ka zhvilluar. 33-vjeçari përveç që dha kontribut të madh në triumfin e Dritës në kampionat, paraqitjet fantastike i ka bërë edhe në sezonin 2020/21.

/koha.mk