Qeveria në Maqedoni sot mbush 100 ditë, opozita kërkon dorëheqjen e saj..

Qeveria aktuale në Maqedoninë e Veriut e udhëhequr nga kryeministri Zoran Zaev sot mbush 100 ditë, të qeverisjes së saj. Koalicioni qeverisës është i përbërë nga një shumicë e ngushtë ku bëjnë pjesë LSDM, BDI, Lëvizja BESA, PDSH si dhe parti tjera minore.
Partitë e koalicionit thonë se kanë një shumicë stabile, edhe përkundër numrit të ngushtë prej 62 deputetëve nga 120 sa ka Kuvendi i Maqedonisë së Veriut, përcjell INA.

Kryeministri Zoran Zaev dhe ministrat e tjerë pritet të deklarohen lidhur me 100 ditëshin e Qeverisë, në një periudhë kur vendi po përballet me shifra ekstreme të infektimeve me Kovid-19, trendet në rënie në sferën e ekonomisë, si dhe kontesti me Bullgarinë, që ka bllokuar çeljen e negociatave me BE-në.

Artan Grubi nga BDI ka theksuar se vendimi i parë i kësaj qeverisjeje ishte institucionalizimi dhe sistematizimi i zëvendëskryeministrit të parë si pozitë që e ushtron ai. Sipas tij, një e treta e seancave qeveritare është mbajtur nga ai dhe se me këtë janë thyer shumë tabu në funksionimin e Qeverisë. Ai ka shtuar se shumica e tanishme është stabile dhe po kryen me përgjegjësi detyrat.

Kryetari i Lëvizjes BESA, Bilall Kasami vlerëson se Qeveria është e fokusuar dhe po ballafaqohet me krizën e pandemisë, dhe se kjo është një sfidë e rëndësishme në këtë situatë aktuale. Ai tha se fokusi tjetër është edhe në planin ekonomik buxhetor për ti dal në ndihmë qytetarëve, planin e eurointegrimeve,etj.

Por, opozita vlerëson se pushteti ka dështuar në çdo sferë të ballafaqimit me zhvillimet aktuale. Andaj ajo ka dorëzuar mocionin e mosbesimit ndaj Qeverisë aktuale.

Partia më e madhe opozitare VMRO-DPMNE theksoi se Qeveria e udhëhequr nga kryeministri Zaev, për 100 ditë qeverisje ka dështuar në çdo sferë, përfshirë ballafaqimin me pandeminë, krizën ekonomike, por edhe kontestin me Bullgarinë, që ndërlidhet me hapjen e negociatave me BE-në.

Nënkryetari i kësaj partie, Aleksandar Nikolovski theksoi mbrëmë në emisionin “360 shkallë” në Alsat se do të dorëzojnë mocionin për votëbesimin e Qeverisë, pasi që Zaev refuzoi të dorëhiqet. Ai tha se vendit i duhet një Qeveri e shpëtimit nacional, për të dalur nga kriza shëndetësore, ekonomike edhe eurointegruese, që kjo e fundit është shkaktuar nga Bullgaria.

Edhe opozita shqiptare ASH- AAA ka kërkuar dorëheqjen e kryeministrit Zoran Zaev, duke renditur dështimet në ballafaqimin me pandeminë, kontestin e emrit me Bullgarinë si dhe dështimin me hapjen e bisedimeve me BE.

Kryetari i Aleancës për Shqiptarët (ASH), Ziadin Sela dje përmes një postimi në twitter, ka shkruar se “Për 3 vjet, Zoran Zaev, Nikola Dimitrov dhe Bujar Osmani kanë gënjyer dhe mashtruar qytetarët për hapjen e bisedimeve për BE. Sot, për herë të shtatë me radhë, ata dështuan përsëri të marrin një datë për fillim të bisedimeve.” Sela shton se “Nesër, qeveria e tyre e re – e vjetër, mbush 100 ditë dhe dorëheqja do të ishte një akt moral.”

Ditëve në vijim do të shihet se si do të rrjedhë seanca për mocionin e votëbesimit të Qeverisë “Zaev2” dhe se a do të përjetojë mbijetesën e saj, për të vazhduar mandatin qeverisës. Numrat janë të ngushtë pasi që opozita ka 58 deputetë përballë 62 të shumicës aktuale, e cila pretendon se do ta ruajë stabilitetin dhe funksionimin e saj. (INA)