Ushtarët zviceranë, për herë të dytë në mision kundër koronës

Pjesëtarët e kompanive mjekësore 1 dhe 2 të ushtrisë zvicerane janë zhvendosur në Moudon të Kantonit VD për operacionin e dytë ushtarak në kuadër të krizës së koronës, njofton srf.ch.
Këto kompani, gjatë ditëve të ardhshme do të përdoren në spitale.

Para fillimit të misionit të tyre, ushtarët janë testuar për koronavirus dhe janë angazhuar ata të cilët kanë rezultuar negativ.

Me këtë rast, përpara mediave, Gjenerali i Divizionit Yvon Langel, komandant i Divizionit Territorial 1 dhe përgjegjës për shërbimin e ndihmës, është shprehur se ushtria do të ndërhyjë në përputhje me parimin e subsidiaritetit, transmeton albinfo.ch.

“Qëllimi pra nuk është të zëvendësojmë sistemin civil, por ta mbështesim atë”, ka thënë gjenerali.

Ai ka shtuar se është shumë krenar me numrin e madh të ushtarëve dhe me atmosferën e mirë që mbretëron në mesin e tyre.

Mobilizimi i këtyre ushtarëve është zhvilluar të premten përmes mesazheve telefonike (SMS), përcjellö albinfo.ch.

Është një kontribut i madh i këtyre qytetarëve, i cili po kërkohet prej tyre pas misionit të parë, të realizuar në pranverë, është shprehur Langel.

Mobilizimi mund të vazhdojë deri në fund të marsit të vitit 2021, që është afati i caktuar nga Këshilli Federal.

/albinfo