Shtetet fqinje në karantinë, Maqedonia ende jo!
Kosova dhe Greqia kanë vendosur të izolohen për shkak të situatës me virusin korona. Greqia është futur në karantinë deri në fund të muajit, ndërkaq Kosova ka bllokuar hyrjen dhe daljen deri të hënën në shtatë qytete përfshirë këtu edhe kryeqytetin Prishtinën.
Ndonëse vendi ynë dominon në rajon për nga numri i të infektuarve dhe rasteve të të vdekurve si pasojë e Covid-19, orë policore apo karantinë nuk ka. Autoritetet shëndetësore vlerësojnë se çelësi i luftës kundër koronës është respektimi i masave aktuale.
“Për momentin nuk ka nevojë për masa restriktive. Apeloj që të respektohen masat që janë fuqi. Të mos dalim nga shtëpitë përveç se nëse kemi ndonjë gjë të domosdoshme siç është për shkollë, market dhe punë”, deklaroi Venko Filipçe – Ministër i Shëndetësisë.
Opoazitarja VMRO-DPMNE në kontinuitet akuzon ministrin e Shëndetësisë Venko Filipçe se keqmenaxhon me pandeminë. Nga kjo parti kërkojnë dorëheqjen e ministrit duke akuzuar se nuk ka asnjë krevat të lirë nëpër covid-spitale dhe se pacientët po trajtohen nëpër oborre të spitaleve.
“Joserioziteti dhe paaftësia e Filipçes na ka sjellë në situatë që kapacitetet e spitaleve të jenë të stërmbushura me pacientë të infektuar me Covid-19, që para nisjes së dimrit dhe sezonit të gripit, nuk ka shtretër të lirë ndërsa shëndetësia ka ardhë në një shkallë që pacientët të marrin infuzione në oborret e spitaleve”, tha Marija Miteva nga VMRO-DPMNE.
Meqë spitalet infektive dhe Covid-qendrat janë stërmbushur, Ministria e Shëndetësise ka vendosur që për trajtimin e pacientëve pozitivë të lëshojë në dispozicion klinikat interne me kapacitet prej 150 shtretërve.
“Klinikat Interne janë vendosur në funksion të trajtimit dhe pacientëve me kovid me 150 shtretër spitalorë. Ne jemi duke rritur kapacitetin akomodues për pacientët e infektuar me Covid-19, kjo nuk do të prishë funksionimin normal të të gjitha këtyre klinikave”, potencoi ministri i Shëndetësisë, Venko Filipçe.
Përndryshe në Spitalin Infektiv të Shkupit po trajtohen 150 pacientë, në Spitalin Kozle 9 pacientë, në Manastir janë të hospitalizuar 70 të infektuar, në Shtip 58, ndërsa nëpër qytetet tjera të shtrirë në spitale infektive janë edhe 500 pacientë. Dje drejtoresha e Spitalit Infektiv të Shkupit Milena Stevanoviq tha se sa shërohet një pacient lirohet një krevat por i njëjti menjëherë zëvendësohet me pacient tjetër. Mesatarisht për rreth 16 ditë shërohet një pacient me pasqyrë të mesme klinike me Covid-19, ndërsa ata që janë me pasqyrë të rëndë klinike, shërimi merr kohë më gjatë për shkak të pasojave që lë infeksioni, shtoi Stevanoviq.
/ts
