Hapja e kufirit pa test me Kosovën, deklarohet edhe Ahmeti

Kryetari i BDlsë, Ali Ahmeti, në konferencë për shtyp duke u përgjigjur në pyetje të gazetarëve nëse ka ndonjë përçarja mes koalicionit LSDM-BDI sa i përket hapjen e kufijve me Kosovën mohoi të ketë probleme brenda Qeverisë.

“Është çështje e ekspertëve, e Institutit për Shëndet Publik (ISHP) dhe institutit e dy vendeve tona duhet të bëjnë vlerësim sepse është përgjegjësia e shtetit që gjërat t’i vendos sipas vlerësimeve shkencore dhe të ekspertëve”, tha Ahmeti.

Ahmeti inkurajoi ISHP-në që të ndërmerr epilog për shkak se, sipas Ahmetit, lëvizja e qytetarëve është në dobi të dy vendeve.

“Varet se çfarë vlerësime do të bëjnë ekspertet nga dy vendet”, tha Ahmeti.

Ndërkohë, siç mësohet mes ministrave të LSDM dhe BDI ka dallime sa i përket hapjes së kufirit pa test PCR midis dy vendeve, por edhe vendeve tjera. Ministri i shëndetësisë, Venko Filipçe është kundër hapjes së kufirit dhe se ai po pret vlerësimin e institucioneve përgjegjëse, përfshirë edhe ato të rajonit, për të vlerësuar se a është koha për hapjen e pikave kufitare pa test PCR.

Por, ministrat nga radhët e BDI-së e kanë quajtur të pakuptimtë situatën e tillë me kufijtë, sidomos me Kosovën, ku kërkohet PCR test jo më i vjetër se 48 orë. (INA)