Sërish protesta kundër shtrenjtimit të energjisë elektrike (VIDEO)

Sonte në disa qytete të vendit do të zhvillohen protesta kundër vendimit për shtrenjtimin e energjisë elektrike për 7.4%. Për dallim nga javët e kaluar, kësaj radhe në Tetovë do të mbahet marsh protestues. Nga këshilli organizativ i protestave kundër shtrenjtimit të energjisë elektrike njoftojnë se marshi do të fillojë nga sheshi “Iliria” dhe do të përfundojë para zyrave të EVN-së.

Këshilli organizativ i protestave

“I ftojmë të gjithë qytetarët e Republikës së Maqedonisë së Veriut që t’i bashkëngjiten marshit. Bëjmë thirrje për pjesëmarrje masive dhe përgjegjshmëri, pasi i ndihmon procesit deri te realizimi i kërkesave të parashtruara më herët”

Përveç qytetit të Tetovës, sot do të protestohet edhe në Gostivar, Shkup dhe Kërçovë.

Në këto katër qytete protesta është paralajmëruar zyrtarisht, por iniciativa të ngjashme ka edhe në Dibër dhe Kumanovë ku poashtu pritet që qytetarët të shprehin pakënaqësinë e tyre përmes protestave dhe marsheve.

Nga këshilli protestues që këtë ditë ka mbajtur një mbledhje të përbashkët në Shkup me përfaqësues nga të gjitha qytetet ku zhvillohen protestat paralajmërojnë se protestën do ta shpërndajnë edhe në qytetet e tjera. Kjo është protesta e pestë me radhë që organizohet kundër shtrenjtimit të energjisë elektrike.

VIDEO:

/shenja