Përplasjet në BDI rikthejnë në tryezë të gjithë skenarët për qeverinë (VIDEO)

Raportet në BDI edhe më tej mbeten të acaruara dhe gjithnjë e më shumë duket se këtë situatë do të duhet ta tejkalojë vetëm kryetari i partisë, Ali Ahmeti, përmes bisedimeve të drejtpërdrejta me kreun e degës së Shkupit, Izet Mexhiti. Nga kjo degë dhe nga dega e Sarajit duken të vendosur që të mos lëshojnë pe edhe me çmimin që të mos votohet Qeveria dhe të ndryshojë krejtësisht situata politike. Kjo gjendje ka bërë të mundur çdo skenar që deri më tani dukej i përjashtuar për sa i takon formimit të Qeverisë.

Nëse nuk ndryshojnë raportet brenda BDI-së, mbetet mundësia që kjo parti të kalojë edhe në opozitë dhe Zoran Zaev t’i ofrojë koalicion opozitës shqiptare dhe disa deputetëve nga partitë e tjera individualisht. Por, përveç këtij skenari i mundshëm mbetet edhe skenari i zgjedhjeve të reja, por edhe ai i formimit të Qeverisë me VMRO-DPMNE-në, nëse pas 20 ditëve nuk votohet Qeveria dhe presidenti i jep mandatin Hristijan Mickoskit.

Burime nga BDI e Çairit kanë thënë që nuk do të lëshojne pe pa u tërhequr të paktën njëri nga dy ministrat për të cilët nuk janë konsultuar strukturat lokale të partisë, Artan Grubi ose Bujar Osmani. Në degën e BDI-së në Çair pretendojnë se Izet Mexhiti është më meritoni për rikthimin e rejtingut të partisë në Shkup dhe rezultatin e arritur në zgjedhjet e 15 korrikut, andaj ai dhe kryesia e degës është dashur të konsultohen dhe të nominojnë kandidatët për ministra.

Mexhiti dhe dega e Çairit kanë edhe mbështetjen e degës së Sarajit dhe deputetit Arben Ziberi, ndërsa jozyrtarisht nëpër media është përfolur se me ta janë edhe degët në Kumanovë dhe Likovë.

VIDEO:

/shenja