Mërgimtarët dorështrënguar, ulet niveli i dërgimit të parave!

Për shkak të pandemisë, provizioni për transfer të parave është ulur, por sërish ka shumë pak transfere të parave nga mërgimtarët. Ankohen edhe këmbimoret, ndërsa një nga sferat më të goditura është ajo e gastronomisë, pasi mijëra ahengje familjare të planifikuara për këtë verë u anuluan.

Për 70 për qind është ulur transferi i parave nga jashtë në vend. Kështu thonë përfaqësues të firmave të cilët merren me këtë veprimtari. Viteve të kaluara, transferi i parave ka qenë më i lartë, kurse këtë vit – pak mërgimtarë dërgojnë para tek të afërmit e tyre. Kjo edhe më shumë do të rëndojë gjendjen ekonomike duke patur parasysh se shumica e familjeve në Pollog mbijetojnë nga dërgesat e të afërmve të tyre. Për shkak të pandemisë, provizioni për transfer të parave është ulur, por sërish ka shumë pak transfere të parave nga mërgimtarët.

“Provizioni është ulur që para pandemisë, por është e kotë kur nuk ka para. Edhe pa asnjë provizion të jetë dërgesa e parave, kur nuk dërgojnë, kjo do të thotë se edhe në vendet e Evropës gjendja është përkeqësuar”, pohojnë në firmat të cilët merren me këtë veprimtari në Tetovë. Me këtë problem përballen edhe këmbimoret.

“Këmbimoret në kohën me pandemisë përballen me probleme shtesë. Para të shpejta mund të dërgohen vetëm euro dhe dollarë, por jo edhe monedha tjera. Me monedhat tjera kemi punuar kur kanë ardhur mërgimtarët, por këtë vit nuk erdhën. Prandaj edhe kemi humbje të mëdha gjatë kësaj kohe”, pohojnë përfaqësues të këmbimoreve në Tetovë. Gjendja e këtillë është reflektuar edhe në shumë sfera tjera të ekonomisë në rajonin e Pollogut.

Gjithnjë e më pak punë kanë bizneset e vogla, të cilët mbijetojnë nga prurjet e mërgimtarëve. Një nga sferat më të goditura është ajo e gastronomisë, pasi mijëra ahengje familjare të planifikuara për këtë verë u anuluan. Gjendja e këtillë vërehet edhe rrugëve të Tetovës, ku ditëve të fundit nuk ka kolona të gjata të veturave sikurse viteve të kaluara, kur rrugët e Tetovës bllokoheshin nga numri i madh i veturave me targa të shteteve perëndimore.

Qytetarët shprehen se pa mërgimtarët, krahas qyteteve – edhe fshatrat janë të vdekur. “Nuk ka asnjë lëvizje, mërgimtarët nuk kanë ardhur dhe gjendja është rënduar shumë. Viteve të kaluara angazhonim punëtorë shtesë në lokal që të shërbejmë në kohë, por edhe për shkak të volumit të madh të punës. Këtë vit punoj vet sepse nuk ka punë, prandaj edhe nuk kam angazhuar punëtorë”, pohon Gazmendi, një pronar lokali në Tetovë. Me këtë situatë përballen edhe shumica e lokaleve afariste dhe bizneseve tjera.

E boshatisur është edhe rruga e butiqeve që viteve të kaluara ishte përplot me njerëz. Në këtë rrugë, pjesa dërmuese e butiqeve janë në kolaps për shkak të anulimit të ahengjeve familjareve, kryesisht dasmave.

Pikërisht nga shitja e veshjeve të nusërisë këta butiqe kanë arritur të mbijetojnë, kurse tani janë në prag të mbylljes shkaku se nuk kanë punë. Bizneset në rajonin e Pollogut këtë verë po përjetojnë ditët më të rënda në 20 vitet e fundit, ndërsa gjendja pritet të përkeqësohet gjatë muajve të ardhshëm, kryesisht në dimër, ngase atëherë do të ndjehen edhe më shumë pasojat e mos ardhjes së mërgimtarëve dhe mos dërgimi i mjeteve në vendlindje.

Nga këto të ardhura dekada me radhë kanë mbijetuar familjet në këtë rajon, ndërsa prurjet e mërgimtarëve kanë pasur efekt pozitiv edhe për tërë ekonominë e shtetit, ngase sipas përllogaritjeve të ekspertëve, në Maqedoninë e Veriut remitencat brenda vitit arrijnë mbi 1 miliardë euro, kurse fatkeqësisht këtë vit këta mjete nuk do të jenë në qarkullim në ekonominë vendore.

(koha.mk)