Kërçovë: Ndërmarrjet ia hedhin fajin njëra-tjetrës, rruga e Krushinës prej tre vitesh e shkatërruar (VIDEO)
Kjo është gjendja e rrugës lokale të Qendrës rekreative Krushinë apo Dardhishtë e cila të çon edhe në fshatin Knezhinë të Kërçovës.
Kjo rrugë është shumë e frekuentuar nga kërçovarët të cilët bëjnë sporte të ndryshme, por edhe familje të cilat dalin për piknik. Por prej 3 vitesh një pjesë e kësaj rruge është gërryer dhe është lënë ashtu. Kjo vështirëson lëvizjen e automjeteve sepse janë formuar gropa të mëdha dhe të pa kalueshme.
Jo vetëm kaq, pak më poshtë është hapur një gropë e madhe gjatë ndërtimit të rrugës, kjo pamje tregon edhe rrezikun që kanë shoferët në rast rrëshqitjesh në kohë me shi. Kjo gropë e hapur rreth rrugës nuk ka asnjë shenjë për paralajmërim rreziku.
“Kjo rrugë ka tre vjet që është prishur nga ndërmarrja e cila është duke ndërtuar autostradën Kërçovë –Ohër ndërsa ende nuk është rregulluar. Kjo rrugë lidh vendin rekreativ Krushinë por edhe fshatin Knezhinë, banorët ankohen se rruga vështirë kalohet me vetura dhe presin sa më shpejt të gjendet zgjidhje për këtë rrugë.” – Salije Sadiku, Gazetare.
Angel Nastov mbikëqyrës kryesor i ndërtimit të autostradës Kërçovë-Ohër tha se problemi qëndron tek Ndërmarrja Pyjet e Maqedonisë. Ata kanë dalë në terren për të evidentuar situatën por ende nuk u kanë dhënë leje për të vazhduar punën në atë pjesë. Ai shpreson se së shpejti të fillojnë me punë për të sanuar atë pjesë të rrugës por edhe për të vazhduar punimet e lëna në gjysmë.
“Bisedojmë me inspektoratin për pyje, bisedojmë me Ministrinë për transport dhe lidhje, me investitorin që të lejohet që të mund të punojmë. Megjithatë ja ka probleme nuk e lejojnë firmën “Granit” inspektorët e pyjeve të fillojë me punë” – thotë Angell Nastov – Mbikqyrës kryesor i ndërtimit të autostradës Kërçovë-Ohër.
Për këtë rrugë TV 21 kontaktoi edhe Ministrinë e Transportit dhe Lidhjeve por nga atje na thanë se për këtë duhet të kontaktojmë Ndërmarrjen Publike për Rrugë Shtetërore. Nga kjo e fundit nuk u përgjigjën në pyetjen tonë duke na informuar se zëdhënësi i ndërmarrjes publike ka shkuar me pushime.
Nga Kompania “Granit” e cila ka tenderin për ndërtimin e rrugës, thanë se në fund të muajit do t’i fillojnë punimet për këtë rrugë e cila është shumë e frekuentuar nga kërçovarët dhe e nevojshme për banorët e Knezhinës.
VIDEO:
/tv21
