Ideja e BDI-së për kryeministër shqiptar është mashtrim (VIDEO)

Njohësit e rrethanave politike vlerësojnë se ideja e BDI-së për kryeministrin e parë shqiptar nuk është asgjë më shumë veçse një mashtrim I elektoratit shqiptar. Analisti politik Sefer Tahiri tha në emisionin ‘Enter’ se ndryshimi i kursit politik të BDI-së është i habitshëm sot, ndërsa në zgjedhjet lokale me ndihmën e LSDM-së fitoi thuajse të gjitha komunat shqiptare.

Sefer Tahiri, analist politik

“Ne kemi pasur një koncept qeveritar që është “shtet për tëgjithë”, të cilin BDI-ja e ka mbështetur brenda Qeverisë, e ka promovuar përmes zv/kryeministrit për Çështje Evropiane, Bujar Osmani dhe përnjëherë ky koncept u bë, sipas deklaratave të këtyre zyrtarëve, koncept i LSDM-së”.

Sipas gazetarit Naser Selmani, deklaratat e LSDM-së kundër BDI-së janë promovim i kësaj të fundit. Madje Selmani vlerëson se edhe VMRO-DPMNE-ja edhe LSDM-ja, partner të pëlqyeshëm e kanë BDI-në dyshon se ‘armiqësia’ mes LSDM-së dhe BDI-së në këtë fushatë, është e koordinuar. Për Selmanin, ideja për kryeministrin shqiptar është tallje brutale me shqiptarët.

Naser Selmani, gazetar

“Do të ishte më e ndershme që të dalin p.sh. nëse kanë fuqi të thonë se ne kërkojmë federalizimin e Maqedonisë, sepse kjo është një ndërrim i sistemit politik të Maqedonisë, nga ai unitar në federal. Por ata nuk kanë fuqi atë ta bëjnë, dhe prandaj janë as andej as këndej, e bëjnë për nevojat e mashtrimit të elektoratit shqiptarë”.

Nga ana tjetër publicisti Robert Nesimi thotë se pas idesë së kryeministrit BDI tenton të fshehë dështimet e njëpasnjëshme në të gjitha sferat gjatë qeverisjes 18 vjeçare.

Robert Nesimi, publicist

“Duke pasur parasysh se nuk hanë bukë më ato tema, si NATO, gjuha, flamuri, integrimet, Unioni Evropian…..BDI-ja është gati 20 vjetë në pushtet dhe ajo nuk ka rezultate në këto lëmi, dmth kjo që jetojmë sot është pasojë e asaj se çfarë ka bërë BDI-ja në 20 vitet e fundit, dhe mendoj se ka qenë shumë e vetëdijshme se nukka çfarë të thotë më në këto tema, dhe është munduar të gjejë një mënyrë se si të ikë nga këto tema dhe dolën me këtë idenë për kryeministër shqiptar”.

Panelistët u bënë thirrje shqiptarëve që sa më masivisht të dalin në zgjedhje më 15 korrik që ta përcaktojnë vetë vullnetin e tyre politik. Mosdalja në votime thanë ata, I shërben vetëm partive në pushtet dhe pamundëson ndryshimin.

VIDEO:

/shenja