Aleanca dhe Alternativa nisën fushatën: Jo me ëndrra por me program konkret (VIDEO)

Futemi në këto zgjedhje jo me ëndrra dhe me dëshira, por me pogram konkret, i cili është përpiluar nga ekspertët më të mirë që kanë shqiptarët në vendin tonë. Kështu është shpehur Arben Taravari në emër të koalicionit Aleanca Për Shqiptarët dhe Alternativa, të cilët sot e hapën fushatën zgjedhore. Taravari nënvizoi se ky program është përpiluar edhe në bazë të mbi 2000 propozimeve nga qytetarë të ndryshëm nëpërmjet aplikacionit “e ardhmja” si dhe qytetarë të tjerë me të cilët kanë realizuar takime. Me çka nënvizojnë se programi është real dhe mund të realizohet brenda 4 viteve. Programi i këtij koalicioni shtoi ai, është bazuar mbi gjashtë shtylla kryesore.

Arben Taravari

“Programi ynë apo oferta jonë është e bazuar në 6 shtylla kryesore. Shtylla e parë e programit shtet për të gjithë është barazi e plotë, dmth këtu e nënkuptojmë barazinë ndërmjet të gjitha etnive që jetojnë në Maqedoni. Shtylla e dytë është shtet i së drejtës. Shtylla e tretë është shteti që kultivon dhe ruan kapitalin njerëzor. Shtylla e katërt është zhvillimi i barabartë ekonomik, territorial dhe shtylla e 6 apo e fundit është shtei zhvillimor, i gjelbërt dhe i digjitalizuar”.

Taravari nënvizoi gjithashtu se kjo fushatë fillon me diskriminim, për faktin se siç tha ai, koalicioni Aleanca për Shqiptarët dhe Alternativa nuk përfaqësohen me anëtarë në Komisionin Shtetëror të Zgjedhjeve dhe nuk kanë përfaqësimin medial për reklamim politik që u takon. Por siguron se edhe përkundër këtyre, siç tha ai, pengesave reale, ky koalicion është favorit dhe do t’i fitojë zgjedhjet.

Arben Taravari

“Më lejoni që në fillim t’iu themi se kjo fushatë po fillon me diskriminim, sepse përkundër faktit që jemi koalicion që kemi 6 deputetë, KSHZ na ka kategorizuar në partitë politike pa deputetë dhe kjo na ka dëmtuar shumë në përfaqësimin tonë në komisionet zgjedhore, si dhe në përfaqësimin medial. Kur kësaj i shtohet fakti se një partie politike që është në koalicionme partinë në pushtet LSDM-në, i mundësohet shfrytëzimi i minutave që janë paraparë për subjekte opozitare, veç na konfirmohet bindja se manipulimi nuk do të jetë leksemë e huaj as e këtyre zgjedhjeve. ”

Taravari tha se konventa promovuese e programit dhe kandidatëve do të bëhet nesër në sheshin “Iliria” në Tetovë, ndërsa tubimet do të realizohen në 7 qytete, Tetovë, Kumanovë, Dibër, Strugë, Kërçovë, Gostivar dhe Shkup, të gjitha këto siç potencoi ai, me respektim të protokolleve shëndetësore për mbrojtje të shëndetit publik. Programin e emëruar “Shtet për të gjithë”, përfaqësuesit e këtij koalicioni do ta shpalosin edhe me takime nëpër vendbanime më të vogla. Nga ky koalicion zotohen për fushatë korekte, pa etiketime dhe sharje, dhe një gjë të tillë e presin edhe nga kundërshtarët politik.

VIDEO:

/shenja