Ka ardhur koha… Nga Kujtim Shabani
Ka ardhur koha për kryeministrin e parë shqiptar. E ka hedhur kushtrimin Kapedani. Komandanti, si e thërrasin kryetarin e partisë më të madhe shqiptare në pushtet. Në Maqedoni. Maqeninë e Veriut. Dhe mediet e tipit „Partia sot“ i kanë ndezur fort prozhektorët t’i bëjnë dritë. I kanë ndezur fort altoparlatët t’i bëjnë jehonë. Dhe një opinion i tërë publik rreket ta mësojë se ç’po bëhet. Se ku do të dalë Kapedani.
Ka ardhur koha për kryeministrin e parë shqiptar. Kaq. Në një dalje tjetër publike, ku do ta shpjegonte idenë e kryeministrit shqiptar pas rreth 20 vitesh në pushtet si partner në qeveritë e vendit, e pshtjelloi atë akoma më tepër. Dhe prozhektorët po na verbojnë. Dhe altoparlantët po na shurdhojnë. Dhe opnionistët po ziejnë. Sa të dalë Kapedani sërish për të hedhur akoma më tepër mjegull. Deri sa të sigurojë një shumicë akoma më të brishtë.
Ka ardhur koha për kryeministrin e parë shqiptar? Pse, a nuk paska luftuar partia e Kapedanit deri më tani për t’i fituar zgjedhjet dhe për ta marrë qeverinë dhe kryeministrin. Partitë politike për këtë ekzistojnë dhe për këtë luftojnë! Pse paska ardhur koha tani për kryeministër shqiptar, kur partia e Kapedanit ka shkuar përgjysmë dhe nuk ishte koha nga fillimi, kur ajo kishte shumë më tepër përkrahje?
Ka ardhur koha për kryeministrin e parë shqiptar? Paska ndërruar mendje Kapedani? Sepse, partia e tij ka një natyrë qytetare. Sepse, partia e tij nuk ka asgjë eksplicite shqiptare në titull. Ky ka qenë orientimi bashkëkohor politik i partisë politike e dalë nga kryengritja popullore shqiptare e vitit 2001 në Maqedoni. Duhet të rrëfet pak Kapedani para shqiptarëve! Çfarë ka bërë dhe çfarë jo. Çfarë ka ndryshuar dhe pse?
Ka ardhur koha për kryeministrin e parë shqiptar? Një kryeministër, i cili, nëse partia shqiptare e shtrëngon kryetarin e partisë fituese maqedonase, do ta kryesojë një qeverisje me shumicë maqedonase dhe do ta hedhë Pajdushkën? Vetëm një herë ka bërë vaki që një parti shqiptare të tërhiqet nga qeveria: Pas historisë së ushkurit Musa-Ermira! S’ka ndodhur as për Ladorishtën, as për Bit Pazarin, as për Lubotenin, as për Brodecin, as për Monstrën…
Ka ardhur koha! Ka ardhur njëmend koha që njëherë në Maqedoninë e Veriut të mbahen zgjedhje vërtet të lira. Ka ardhur koha që politikanët shqiptarë, ata që gjoja e duan kryeministrin shqiptar dhe ata që gjoja s’e duan kryeministrin shqiptar, ta braktisin pazarin e votave për t’i votuar ata dhe mbledhjen e letërnjoftimeve për të mos e votuar kundërshtarin. Ky është një sekret publik. Kanë neveritur dynjanë!
Ka ardhur koha! Ka ardhur njëmend koha që njëherë në Maqedoninë e Veriut të dalin para gjyqit të gjithë ata të cilët kanë manipuluar me votën e qytetarëve në zgjedhjet e deritanishme. Dhe ka ardhur njëmend koha që njëherë të dalin para gjyqit ata të cilët janë dëgjuar dhe parë duke abuzuar me paratë publike në vend. Nga cilado parti a etni qofshin këta. Nuk shkohet në qeverisje të re me kusure të vjetra.
Ka ardhur koha! Ka ardhur njëmend koha që partitë shqiptare t’u ofrojnë zgjedhësve të tyre në votime njerëz me integritet moral dhe rekorde të mirëfillta profesionale. Njerëz që nuk e citojnë fundekrye liderin e tyre, siç citohet Aristoteli në hyrjet e teksteve të ndryshme nëpër shkolla. Njerëz që nisen t’i shërbejnë komunitetit para liderit dhe partisë. Që e konkurrojnë atë dhe të aftë për kryeministra!
Ka ardhur koha! Ka ardhur njëmend koha që njëherë partitë politike shqiptare të heqin dorë nga politizimi i administratës dhe të gjithë jetës publike. Dorëheqje nga partizimi i jetës publike! Liri cilësisë! Sepse gjëja e parë që kanë bërë partitë shqiptare kur e kanë fituar vendin e dytë! ka qenë ndërrimi i rektorit të Universitetit të Tetovës dhe të drejtorëve e të mësuesve të të gjitha shkollave, deri edhe atyre në katundin më të thellë!
Ka ardhur koha! Ka ardhur njëmend koha…
Nga Kujtim Shabani
/prointegra
