Rrëfenjëza – Poezi nga Xhelal Ademi komponuar nga Uskana (VIDEO)

Rrëfenjëza

Ndërsa ti po më rrëfeje rrugën dëm që të ka shkuar
Se ç’mu shpifën shllunga reje që s’i hiqja dot me duar,
Ndaj i ndrojtur tutje renda, gjersa veten nuk e pashë
Tek rrëshqiste aty brenda, mu te brenga jote rashë.

Pashë qepallat që t`u lagën, kur dy qiejt të pikën lot
Dhe kur shiu t`preku plagën që s’e pate mbyllur dot,
S`di pse gjoksit pa frymë mbeta, dhe kuptova që jam lodhur
S`u pendova pse të gjeta por pse makthi të pat ndodhur.

Ndaj më shkrepi një dëshirë, t`më rrëfesh diçka të re
Jo për brenga dhe mëshirë, jo nga toka të të ngre
Sepse tash që rrugë të reja na kanë sjellur gjer këtu
Nuk më vriste më rrëfeja, por më vrisnin sytë e tu…

xhelal ademi

VIDEO: