Bilanci i fundit nga koronavirusi, mbi 13 mijë viktima dhe 308 mijë të infektuar

Pandemia e koronavirusit ka prekur rreth 100 shtete të botës duke infektuar mbi 308 mijë persona.
Numri i vdekjeve në nivel global ka arritur në 13,069, ndërsa të shëruar plotësisht janë 95,829 persona. Këto janë të dhënat më të fundit që raporton Ansa, duke iu referuar botimit nga Universiteti Johns Hopkins.

Kina është vendi më i infektuar në botë, i cili ka konfirmuar 46 raste të reja me infeksion dhe 6 vdekje gjatë 24 orëve të fundit. Numri total i të infektuarve është 81.054, ndërsa i viktimave është 3261.

Shteti me bilancin më tragjik të viktimave është Italia me 4825 të vdekur dhe 53.578 të infektuar.

Një rritje të madhe të numrit të të infektuarve ka patur edhe ShBA, që ka konfirmuar 46 vdekje dhe 2685 raste të reja në 24 orët e fundit. Në Shtetet e Bashkuara të Amerikës ka gjithsej 26892 të infektuar dhe 348 viktima.

Deri tani, Europa është zona më e prekur nga koronavirusi, e cila ka infektuar rëndë edhe Spanjën. Aty ka 25.496 të infektuar, nga të cilët kanë ndërruar jetë 1.381 persona.

Ndërsa Shqipëria ka konfirmuar 76 të infektuar, nga të cilët dy persona kanë ndërruar jetë dhe dy janë shëruar plotësisht

/ts