Zvicër zbrazen marketet nga frika e koronavirusit!

Edhe pse autoritetet po bëjnë thirrje për maturi kur bëhet fjalë për koronavirusin, shumë njerëz janë të shqetësuar: Kjo është qartë e dukshme ndër të tjera, tek shitoret me pakicë, shkruan srf.ch. Mund të shihen boshllëqe në raftet që përndryshe duhet të jenë të plota, në shumë vende sepse konsumatorët e shqetësuar janë duke u furnizuar me shumicë.

Në raftet ku zakonisht ka produkte të konservuara ose oriz, të shtunën vazhdimisht kishte boshllëqe, transmeton albinfo.ch. “Ne kemi vënë re që nga fillimi i javës një kërkesë të shtuar për mallra të konservuara. Njerëzit janë posaçërisht në kërkim të këtyre produkteve”, thotë Marcel Schlatter, zëdhënës i Migros-it.

Në disa dyqane të Migrosit, aktualisht raftet mbushen deri në gjashtë herë në ditë, ndërkohë që në ditët normale ato mbusheshin vetëm një herë në ditë, përcjell albinfo.ch. Mallrat e konservuara, makaronat, orizi dhe vaji janë veçanërisht të kërkuara nga klientët.

Ueli Haudenschild, shef i sektorit të Ushqimit dhe Barnave në Zyrën Federale për Furnizim Ekonomik (BWL), shpjegon se në Zvicër praktikohet mbajtja e një depoje të detyrueshme për produkte ushqimore themelore si sheqeri, orizi ose vaji i gatimit: “Ne i detyrojmë furnizuesit dhe shitësit me pakicë që ushqimet të cilat nuk prishen t`i mbajnë në magazinë në rezerva që mjaftojnë për tre muaj”.

Edhe nëse importet nuk do të ishin më të mundshme ose do të zvogëloheshin, gjithmonë jemi në zotërim të këtyre rezervave të detyrueshme, thotë Haudenschild.

“Nuk mund të flitet për telashe, ne jemi të përgatitur mirë”, thonë në Migros, transmetoin albinfo.ch. Problemi, sidoqoftë, është se logjistika duhet të vazhdojë punën, tha zëdhënësi Schlatter.

Kjo është arsyeja pse janë rritur kapacitetet në logjistikë, me tren dhe në rrugë në mënyrë që Migros të mund të përmbushë mandatin e tij themelor të furnizimit. “Tani jemi duke punuar ashtu që sapo raftet të zbrazen, ato të mbushen menjëherë me mallra të reja. Por ne, padyshim që kemi artikuj të mjaftueshëm në depot e dyqaneve”.

/albinfo