Në Kërçovë hapet muze-galeri e artistit me famë botërore Omer Kaleshi

Pas Parisit dhe Stambollit, piktori shqiptar me famë botërore Omer Kaleshi, do të nderohet edhe në vendlindjen e tij, Kërçovë.

Ministria e Kulturës në Maqedoninë e Veriut ka ndarë 2 milionë denarë, për hapjen e galerisë-muze të Omer Kaleshit, një gjë që i ka munguar Kërcovës, duke pasur parasysh se galeri të tilla për të ekzistojnë në Francë dhe Turqi, vende ku Kaleshi jeton herë pas here.

Omer Kaleshi është me origjinë nga Kërçova e shqiptarëve të Maqedonisë. Jeta dhe itineraret e tij rrokin pothuaj një pjesë të mirë të Ballkanit: përkundja në botën shqiptare, fëmijëria dhe adoleshenca në Maqedoni, studimet në Turqi për të ngjizur më pas në botën e tij krijuese temën dhe dramën ballkanike, dervishët dhe barinjtë, ehon e luftrave dhe klithmën për paqen.

Ai jeton dhe krijon në Paris, në bulevardin Arago, në një studio që gjëndet në çatinë e një ndërtese ku artisti mund të ngjisë pothuaj shkallët drejt qiellit. 30 vjet krijimtari në Paris nuk janë pak në jetën e një piktori, i cili shpreson më së fundi, të ekspozojë dhe në Shqipëri pikturat e tij.

Kjo do të ndodhë në mars të vitit të ardhshëm, ç’ka do të shënojë dhe pikëtakimin e parë me publikun e gjerë, paçka se tashmë piktura e tij njihet dhe në vendin tonë.

/lajmpress