Kërçovë në orët e vona mungojnë linjat qytet-fshat

Ka vite që Shoqata e transportuesve “ZHAS-Kërçova”, ka ikur në histori dhe tashmë autobusët, të cilët bënin bartjen e udhëtarëve që Kërçovën e lidhnin me qendrat tjera dhe me vendbanimet e fshatrave përreth Kërçovës, i përkasin një kohe tjetër, shkruan gazeta KOHA. Privatizimi (nuk dihet se si u bë), atëbotë, përpara mbi njëzet viteve, këtë kompani e shndërroi në pronë private, që menaxhimin e saj e mori një kompani private që quhej “Simeks”, e cila përpara dy viteve po ashtu kaloi në histori.

Tanipërtani, udhëtarët që duan të udhëtojnë nga Kërçova për në qytetet tjera të Maqedonisë, këtë e realizojnë përmes linjave transitore, kryesisht përmes kompanisë “Vakçare” nga Struga, e cila ofron shërbime më të lira të udhëtimit, dhe që kryesisht Kërçovën e lidh me qytetet e Strugës, Gostivarit, Tetovës dhe Shkupit, por edhe me Beogradin përmes një linje të saj direkte nga qyteti i Strugës, gjatë orëve të mbrëmjes.

Përpos kësaj kompanie, nëpër Kërçovë, transitojnë edhe NT “Galeb” nga Ohri, e cila kryesisht bën lidhjen e Kërçovës me Ohrin dhe Shkupin (pasi linjat e saj nuk kanë paraparë edhe të kalojnë nëpër qytetet e Gostivarit dhe Tetovës), dhe kësisoj studentët e shumtë nga Kërçova, udhëtimin e tyre e realizojnë përmes kompanisë “Vakçare” nga Struga, por edhe përmes linjave të furgonëve të shumtë, të cilët lidhin qytetin e Kërçovës, me Strugën, Prilepin, dhe anasjelltas. Ndërkohë, përderisa, komunikimi i Kërçovës me qytetet tjera, mund të thuhet se është në nivel të kënaqshëm, lidhja e qytetit me qendrat rurale kryhet përmes furgonëve privatë, të cilët e bëjnë bartjen e udhëtarëve nga vendbanimet rurale për në Kërçovë dhe anasjelltas.

Megjithatë, qytetarët e vendbanimeve rurale të rajonit të Kërçovës e humbin komunikimin me qytetin në ora nëntëmbëdhjetë, sepse transportuesit e udhëtarëve për linja të rregullta këtë orë e kanë kufirin e fundit të qarkullimit nëpër këto vendbanime. Para shumë vitesh, kur fluksi i makinave ishte më i vogël, bartja e udhëtarëve për në fshatra organizohej përmes autobusëve të rrjetit lokal, por nuk mungonte as lidhja e Kërçovës me qytetet tjera. Pothuaj për në çdo fshat kishte linjë autobusi dhe me këtë po udhëtonin banorë të shumtë.

Tashmë kohërat kanë ndryshuar. Shumica e familjeve që po jetojnë në fshatra kanë siguruar veturën e tyre private dhe nevojat familjare dhe shërbimet vetanake i kryejnë me vetura private. Megjithatë, jo të gjithë qytetarët kanë mundësinë të kenë veturën e tyre. Duke pasur parasysh krizën ekonomike që përditë e më shumë thellohet, ka shtresa të qytetarëve, të cilat nuk mund t’ia lejojnë vetes këtë luks. Megjithatë, nga administrata e komunës janë shprehur se këtë problem e kanë zgjidhur duke ofruar koncesione për autotransportuesit e shumtë privatë, të cilët bartjen e tyre e kanë bukë të gojës.

Zyrtari në kabinetin e kreut të Komunës së Kërçovës, Fatmir Dehari, Emin Nasufi, thekson se “sa i përket kësaj çështjeje komuna ka bërë oferta për licenca të bartjes së udhëtarëve dhe transportuesit privatë kanë aplikuar për marrjen e këtyre licencave dhe tanimë ky problem ka mbetur në duart e auto-transportuesve apo pronarëve të furgonave, të cilët kanë marrë licencën për këtë veprimtari. Shoqata e transportuesve të udhëtarëve ka bërë një kodeks bashkëpunimi dhe ka ndarë vijat e rregullta të këtij transporti. Por, ata nuk kanë paraparë që në mes të qytetit dhe vendbanimeve rurale të ekzistojnë linja të rregullta edhe në orët më të vona të natës, kështu që qytetarët të kenë më tepër hapësirë kohore për të qarkulluar në linjën qytet-fshat”, thekson Emin Nasufi.

Më tutje, ai këtë e komenton me faktin se në këto orë lëvizja e qytetarëve është më e rralluar, andaj shoqata e transportuesve ka rënë dakord që linja e fundit të jetë paksa më herët. “Këta transportues të udhëtarëve i kanë marrë licencat e qarkullimit nga ana e komunës, por itinerari i lëvizjes nuk është i caktuar nga ne. Ata vetë kanë bërë marrëveshjen e qarkullimit dhe tanipërtani linja e fundit që lidh qytetin me fshatin janë furgonat dhe autobusët që merren me transportin e nxënësve”, thotë ai.

Sipas Nasufit, linjat e këtyre drejtimeve do të pësojnë ndryshim në favor të zgjatjes së këtij orari në stinën e verës kur qytetarët më tepër kanë nevojë t’i shfrytëzojnë këto linja. Me një fjalë, vijat e rregullta të qarkullimit nga qyteti drejt vendbanimeve të fshatrave janë limituar deri rreth orës nëntëmbëdhjetë, hiq këtu udhëtimin e nxënësve.

“E kemi të vështirë të qëndrojmë deri vonë në qytet. Shpeshherë na ndodh që në linjën e fundit të kthehemi pa udhëtarë dhe për këtë ia mësyjmë më parë për në shtëpi. Edhepse ne caktojmë orarin e linjës, qytetarët janë të paorganizuar. Ata dëshirojnë që me të hipur në bus të nisemi menjëherë, ndërkohë që ne duhet të presim orarin e nisjes. Shpeshherë për këtë nuk hasim në mirëkuptim. Konkurrenca jolojale të shpeshtën është pengesë, ngase ata na i marrin udhëtarët, të cilët nuk ia dinë rregullit.

Mendoj se një rregullore dhe një kontroll i veçantë do të ndikonte në zbutjen e padrejtësive ndaj nesh që bëhen nga konkurrenca jolojale, ngase ne më në fund jemi taksapagues”, thotë një shofer minibusi i linjës Kërçovë-Zajaz. Qytetarët, të cilët e kanë të domosdoshme lidhjen qytet-fshat, pas këtij orari, janë të detyruar që të paguajnë taksi që të mbërrijnë në këtë drejtim. Në këtë rast më tepër janë të goditur ata qytetarë të cilët kanë punë të rregullt në qytet dhe duhet të kthehen nga ai përtej orarit të këtyre linjave. Të tillë persona ka shumë.

“Neve na duhet një linjë e rregullt, e cila duhet të vendoset së paku rreth orës 21 përndryshe e kemi mjaft të vështirë që të kthehemi nga puna. Pasi një linjë e tillë mungon, më mbetet që të planifikoj udhëtimin për në punë sidomos kur e kam të domosdoshme të mbetem vonë në qytet dhe ta marr veturën time. Nuk është kjo e leverdishme, po kur s’kam zgjidhje tjetër, duhet patjetër të bëj këtë.

Sa më përket mua, unë kam gjetur zgjidhjen pasi bleva makinën time dhe kjo ndonëse ma zbraz xhepin, ma kursen kohën”, thotë Xhemail Ahmeti, qytetar i Zajazit, i cili nganjëherë gjendet në situatë të vështirë për të mbërritur në shtëpi. Kur jemi tek udhëtimi, tashmë është bërë praktikë që udhëtimi të bëhet në mënyrë të organizuar, ku përpos TC”Osllomeja”, e cila ka autobusët e saj për bartjen e punëtorëve, po vërehet që këtë praktikë po e vë në jetë edhe kompania amerikane “KSS”, e cila tashmë përmes Ndërmarrjes për transport “Galeb” nga Ohri, po bën bartjen e punëtorëve nga Kërçova për në vendbanimet rurale.

Nga Adem Xheladini

/koha.mk