Nis lufta mes Amerikës dhe Iranit, goditen caqet e para

Irani ka sulmuar me raketa 2 baza ushtarake irakene që strehojnë ushtarakë dhe personel të koalicionit amerikan në Al-Asad dhe Irbil.

Me dhjetëra raketa u lëshuan në baza, raportoi fillimisht televizioni shtetëror i Iranit. Lajmi u konfirmua edhe nga Pentagoni. “Është e qartë se këto raketa u hodhën nga Irani dhe synuan të paktën dy baza ushtarake irakene që strehojnë ushtarët dhe personelin tonë,” tha në një deklaratë Jonathan Hoffman, ndihmës Sekretari i Mbrojtjes për Çështjet Publike.

“Ne jemi duke punuar në vlerësimet fillestare të dëmtimit të këtij sulmi. Bazat, kanë qenë në gatishmëri “për shkak të indikacioneve që regjimi iranian planifikoi të sulmonte forcat dhe interesat tona në rajon”- shtoi ai.
Pentagoni në një deklaratë bëri me dije që do të marrë masa për të mbrojtur të gjithë ushtarët dhe personelin amerikan.

Disa orë pas sulmit, Presidenti Donald Trump shkroi në Twitter:

“Gjithka është mirë! Irani hodhi raketa në dy baza ushtarake në Irak. Eshtë duke u bërë vlerësimi për viktimat dhe dëmet. Deri tani, mirë! Ne kemi ushtrinë më të fuqishme dhe më të pajisur në botë, shumë më tepër se kushdo! Do të bëj një deklaratë nesër në mëngjes.”

Një burim irakian i sigurisë i tha televizionit CNN se në bazën ajrore al-Asad ka patur viktima mes irakianëve, megjithatë nuk dihet nëse fjala ishte për të vrarë apo të plagosur.

Shtëpia e Bardhë tha se Presidenti Donald Trump është informuar dhe po këshillohet me ekipin e tij të sigurisë kombëtare. Sekretari i Shtetit Mike Pompeo dhe Sekretari i Mbrojtjes Mark Esper shkuan të martën vone në Shtëpinë e Bardhë.

Eliot Engel, kryetar i Komisionit të Punëve të Jashtme në Dhomën e Përfaqësuesve, i tha televizionit CNN se “Presidenti dhe ekipi i tij do të ishte mirë të gjenin një mënyrë për të ulur tonet, sepse mund të përfundojmë në një luftë me përmasa të plota.”

“Ajo që ne duhet të bëjmë tani është të zbutet retorika nga të gjitha palët dhe ta nxjerrim veten nga kjo situatë,” shtoi ai.

Forcat amerikane kanë qenë në gatishmëri pas kërcënimeve të Iranit se do të kundërpërgjigjej me sulme si hakmarrje ndaj vrasjes së Solejmanit.

“Ne do të marrim të gjitha masat e nevojshme për të mbrojtur personelin amerikan, partnerët dhe aleatët në rajon,” tha zëdhënësi i Pentagonit.

/INA