Shoqata USKANA SHBA organizon kontrolla falas nga mjek shqiptarë

Kemi kënaqësinë t’ju informojmë se Shoqata Uskana në bashkëpunim me Grupin Mjekësor Ndërkombëtar Shqiptar (Albanian International Medical Team) do të mbajë panairin e parë të shëndetit dhe klinikën falas për Komunitetin Shqiptar në Chicago. Ju mirëpresim të merrni pjesë Ditën e Diel, 8 Dhjetor 2019 në Qendrën Islamike Shqiptaro-Amerikane (Xhamija), me orar 10:00 am – 3:00 pm.

Shoqata Uskana është me fat që mund të sjelli edhe Dr. Mario Ademaj, i cili me vete sjell përvojën e organizimeve të klinikave falas në Shqipëri dhe Kosovë. Dr. Mario së bashku me organizatën e tij, dhe në bashkëpunim me Shoqatën Uskana si dhe grupin e mjekve dhe punonjësve mjekësor nga Kërçova do të bëjnë kontrolle dhe vlerësime të ndryshme mjekësore, si dhe këshilla për të gjithë ata që kanë nevojë për trajtim mjekësor, dhe e gjithë kjo FALAS!

Te klinika jonë do të bëhet matje e proceseve vitale si shtypja e gjakut, niveli i oksigjenit, pulsi dhe matja e nivelit të diabetit.

Më pas do të keni mundësi të diskutoni me njërin nga mjekët tonë profesional dhe të merrni këshilla mjeksore për cilëndo çështje mjekësore me të cilën ballafaqoheni.

Gjatë vizitës mund të merrni me vete edhe raportet apo analizat më të reja mjeksore, si dhe ilaçet që jeni duke marrë për momentin që të diskutoni me mjekët, dhe të kuptoni në thelb efektin e tyre apo çështjen me të cilën luftoni.

Gjithashtu do të kemi edhe tavolina të posaçme te të cilat mund të këshilloheni në lidhje me diabetin, kujdesin preventiv dhe mirëqenien mentale. Për studentët e ardhshëm në mjeksi, profesionistët tanë mjeksorë do të ndajnë këshilla që do t’ju ndihmojë gjatë rrugëtimit tuaj në mjeksi.

Të gjithë janë të mirëseardhur, prandaj Ju lutemi shpërndani lajmin me të afërmit tuaj që kanë nevojë për kujdes dhe trajtim mjeksor.