Zvicra shtrenjton rrymën elektrike !
Vitin që vjen në Zvicër do të ketë një ngritje të çmimit të energjisë elektrike prej rreth 1 për qind për konsumatorët privatë. Për një familje mesatare tipike zvicerane i bie se ngritja e çmimit do të jetë rreth nëntë franga në vit në krahasim me vitin paraprak, bën të ditur Komisioni Federal për Elektricitet, ElCom.
Kështu, shpenzimi i 4500 kilovatorëve, në vitin 2020 do të kushtojë rreth 930 franga, transmeton albinfo.ch. Konsumatorët do të paguajnë nga 0.2 rapë më shumë se deri tash ose gjithsej 20.7 rapë për kilovatorë.
Rreth dy të tretat e operatorëve të rrjetit të energjisë elektrike do ta shtrenjtojnë prodhimin e tyre, thuhet më tutje në njoftimin e ELCom. Ndërsa rreth një e treta e tyre, janë kundër ngritjes ose parashikojnë edhe ulje.
Tarifat e energjisë elektrike krijohen nga bashkimi i tarifës së shfrytëzimit të rrjetit, nga vetë tarifa e energjisë, nga pagesat që u bëhen komunave dhe nga shtesa për rrjetin.
/albinfo.ch
