Bekteshi: Intensivisht po investojmë në infrastrukturë,rruga nga Pelagonija deri në Shkup do të shkurtohet për 60 km

Ministri i ekonomisë Kreshnik Bekteshi së bashku me zv.kryeministrin dhe ministrin për sistem politik dhe marrëdhënie me etnitetet Sadulla Duraku dhe drejtorin e ndërmarrjes publike “Makedonija pat” Bekim Memedi kanë inspektuar punimet e rrugës që shpie për në Gostirazh-Crnilishtë në komunën e Dollnenit.

Gjatësia e përgjithshme e kësaj rruge që lidh komunën e Çashkës dhe Dollnenit është 11 km, ndërsa investimi kap vlerën prej 80 milion denarë.

“Sot kemi ardhur për të inspektuar rindërtimin e kësaj rruge e cila është shumë e rëndësishme dhe ka qenë një kërkesë e kahmotshme e banorëve të këtij rajoni. Kjo kërkesë tani është realitet. Ky është një investim prej 80 milion denarë, i cili do të lidh komunat Dollneni dhe Çashkë dhe në të njëjtën kohë do të shkurtojë udhëtimin e të gjithë banorëve që udhëtojnë për në Shkup. Vetëm në një drejtim udhëtimi për në kryeqytet shkurtohet për 60 km. Ne si Qeveri jemi të përkushtuar në ndërtimin e infrastrukturës. Qëllimi ynë kryesor është të sigurojmë jetë më të mirë për të gjithë qytetarët. Që nga viti i kaluar ne kemi punuar intensivisht në ndërtimin e infrastrukturës në të gjithë vendin. Po investojmë  intensivisht edhe në ndërtimin e rrugëve të reja dhe rindërtimin dhe rehabilitimin e atyre të vjetrave që janë harruar me dekada” u shpreh ministri i ekonomisë Kreshnik Bekteshi.

Drejtori i NP “Makedonijapat” Bekim Memedi informoi se asfaltimi i rrugës nga fshati Crnilishte për në Çashkë ka filluar disa ditë më parë dhe faza e parë do të përfundojë deri në fund të muajit.

“Kjo rrugë është 11 km e gjatë nga Crnilishtja deri në lumin Babuna në komunën e Çashkës, faza e parë është e gjatë 7 km e cila do të jetë e shtruar dhe asfaltuar plotësisht, ndërsa rindërtimi dhe ndërtimi i fazës së dytë do të fillojë javën e ardhshme. Sipas parashikimeve, deri në fund të muajit duhet të përfundojë ndërtimi i fazës së parë, por megjithatë bëhet fjalë për një projekt të vështirë dhe me rëndësi të madhe prandaj presim që rikonstrukcioni i gjith rrugës të përfundojë deri në fund të vitit “, deklaroi drejtori Memedi.

Sipas të dhënave më të fundit, që nga fillimi i vitit realizimi i ndërtimit të rrugëve në vend është mbi 35 përqind.