Vetëdija e pushtetarit të korruptuar – nga Bekim Adili

Kërçova aktuale

Organizimi i jetës institucionale do të thotë të shprehish vëmendje ndaj anëtarëve dhe mbështetësve, respekt të përhershëm njerëzor, të rinjve, kaudrove të mira, profesionistëve të vërtetë, t’u jepet inspirim dhe promovim, ku gjithsecili sipas meritës dhe jo sipas preferencave personale do të merrte pozicionin që i takon brenda shoqërisë ku jetojmë

Thuhet se reagimi ndaj kritikës rëndom është vetëzbulimi i vetëdijes të atij që reagon ndaj kritikës. Për të sqaruar lexuesin, në një rast, kur dy këshilltarët e pavarur të Komunës së Osllomesë nëpërmjet një opinioni botuar më 10 janar, kritikuan punën e kryetarit dhe strukturave udhëheqëse të Komunës së Osllomesë, ato, pra strukturat e po të njëjtës komunë, tetë ditë më vonë më 18 janar të këtij viti, patën reaguar, duke i konsideruar dy këshilltarët e pavarur si ‘dorë e zgjatur’ e tjetërkujt, ku aludonin personalisht për mua që po shkruaj këtë shkrim, me që në vitin 2009 kam qenë si kundër-kandidat i kryetarit aktual të komunës në fjalë.

Thjeshtë, strukturat udhëheqëse të kësaj komune mendonin që këshilltarët në fjalë njëri veteran i arsimit, tjetri me nivel arsimor të mesëm si shumica e këshilltarëve të Këshillit të Osllomesë, se nuk mund të jenë ato, të cilët ta kenë mendimin e tyre kritik, autonom ndaj padrejtësive që ndodhnin në punën e Këshillit, administratës dhe nga kryetari i komunës.

Reagimi i tyre i zakonshëm ndaj një kritike konstruktive që nxirrte në sipërfaqe shumë qartë korruptimin e pushtetit,u shoqërua nga kryetari i Komunës me forma presioni ndaj njërit këshilltarë që të heqë dorë nga shkrimi duke i kërkuar të mohojë veten, ndërkaq ndaj meje, kryetari aktual, hidhte dyshime se qëndroj unë prapa atyre kritikave, me idenë se nuk janë të vërteta ato që u shkruan në gazetë, duke u përpjekur kështu t’u mbushte mendjen disa miqve të përbashkët, me idenë për të zhvleftësuar kritikën e dy këshilltarëve të pavarur, kritik e cila në brendësi përmbante një lumë argumentesh për aferat e mundshme korruptive dhe mos përgjegjësinë e treguar ndaj qeverisjes, pikërisht nga kryetari aktual i komunës së Osllomesë Fatmir Dehari, të cilin moralisht detyrohem për ta shpjeguar nëpërmjet gazetës suaj, e ku bashkë me të dhe opinionin në përgjithësi, se cilat janë pikëpamjet që kam unë për qeverisjen e tre viteve të fundit të Komunës së Osllomesë në krye të së cilës është vetë ai.

Përpara se të radhisë një sërë argumentesh, e përpara se të shfaq cili është botëkuptimi im për qeverisjen e një institucioni publik si që është Komuna e Osllomesë, në të cilën jetojnë 99 për qind shqiptarë, do të vërejmë se ajo që kemi jetuar gjatë tre viteve qeverisje është se kryetarin e Osllomesë, veprimet e ndjekura nga ai e fusin në kategorinë e sundimtarëve, që institucionin e shikojnë vetëm përmes vetes dhe në funksion të vetes e që nuk u vlejnë dijet e të tjerëve sa do të mëdha të jenë ato, e as këshillat sa do të urta e të vlefshme të jenë ato, për të kontrolluar instinktet edhe pse të mbajtura në fre, të madhështisë me të cilën karakterizohet ai.

Arsyet se përse mendoj kështu janë të shumta por fillimisht po jap dy argumente të cilat flasin qartë se Dehari, marrjen e institucionit të komunës e ka pasur si qëllim për të përfituar vetëm për vete, e jo si mjet për të realizuar qëllimet në përfitim të vendit e popullatës, argumente të cilat i dëshmoj me faktin i cili nisë me marrjen e mandatit të tij ku punët e para që realizoj, ishte pajisja e zyrës ku do të punonte me mobilim të shtrenjtë dhe tjetra ishte vendimi i parë i Këshillit blerja e veturës së re me kredi për nevoja të kryetarit të sapo zgjedhur.

Këto dy veprime, parë nga këndvështrimi që kam unë për një udhëheqës institucioni, sidomos në një kohë krize të shpenzosh për luks personal paratë e qytetarëve, ku shumica jetojnë në varfëri, kryetarin e Komunës së Osllomesë do ta paraqisnin si një personalitet me sens të mangët për udhëheqjen e institucioneve, vendime nëpërmjet të cilave do të shprehte më shumë sensin e lartë për interesat e veta, pushtet nga i cili do të ndërtonte një pushtet personal e ku nëpërmjet të cilitmë pas do t’u shpërndante favore puthadorëve dhe oborrtarëve të tij, duke e identifikuar kështu kënaqësinë e komoditetit që i ofron pushteti me interesin e komunitetit.

E shpreh këtë bindje, sepse veprimi i radhës i kryetarit aktual të komunës së Osllomesë, duke shfrytëzuar pozicionin do të ishte përfitimi i një burse studimi për master, të cilën do ta kryente, duke udhëtuar gati çdo dy javë për në Tiranë me veturën që bleu nga taksapaguesit e qytetarëve të tij e duke u akomoduar me paratë e buxhetit të popullatës së tij, e cila shpesh herë i prishte planet e udhëtimit, sa herë që ato protestonin në rrugë, për të fituar një punë në Termocentralin nga i cili dilnin retë e tymit nga qymyri i vdekjes, mbledhur si top e që qarkullonte mbi kokat tona.

Them që bllokimi rrugëve e inatoste, sepse ai hapur luftonte mbi njerëzit që dilnin në rrugë për të braktisur protestën, ku sa herë që hapeshin konkurse punësimi pikërisht nga qëndresa e varfanjakëve që rrinin në rrugë duke protestuar, kryetari i Komunës me forma të ndryshme presioni ndërronte emrat e listave të Bashkësive lokale,duke i zëvendësuar ato me persona të preferuar nga ai, o në baza shoqërie, o familjare e më pak partiake, dëshmi të cilat ekzistojnë për t’i verifikuar kurdo qoftë e nevojshme.

Në vazhdën e gjykimeve të mia, duke mos hyrë të trajtojë me shifra shpenzimin e buxheteve të viteve të kaluara apo të buxhetit të miratuar të këtij viti,ku për të kuptuar abuzimin dhe aferat korruptive që ekzistojnë aty e me të cilat do të merren institucionet shtetërore si që është Komisioni për Antikorrupsion, mjafton të merren dy apo tre elemente si që është rritja e buxhetit të institucionit të kryetarit për 24.000 euro më shumë, krahasuar me dy vite më parë, sikur brenda institucionit të kryetarit të Komunës së Osllomesë funksionon kabineti i tij, apo janë themeluar sektor të veçantë, e jo se institucioni është vetë Fatmir Dehari, apo mos respektimi i vendimeve të Këshillit si dhe mungesa e transparencës se ku shpenzon paratë që i vijnë nga ELEM për ndotjen që i bëhet ambientit e të cilat duhet të shpenzohen vetëm për projekte që kanë të bëjnë me ruajtjen e ambientit jetësor, është shprehja e shqetësimit i cili ka të bëjë me mos përfilljen e qytetarëve, me votën e të cilëve kryetari aktual rrethohet nga privilegji i pushtetit.

Por nga buxhetet e viteve paraprak, kryetari i komunës i kënaqur ndoshta nga pak prerje shiritash për segmente të vogla që kanë të bëjnë me infrastrukturën, nga të cilat nuk përjashtohen përqindjet e tenderit, trumbeton se ka bërë maksimumin e mundshëm brenda kapaciteteve të tij, i cili mesa duket udhëhequr nga metoda qeverisëse e mentalitet fshataresk e që do të thotë shprehje e mungesës së vëmendjes ndaj disa shtresave të popullatës si që janë emigrantët, studentët, afaristët e pjesëtarë tjerë të shoqërisë sonë, do të vërejmë qartë nga argumentet që do të pasojnë, se tek kryetari aktual i komunës sonë, aspak nuk ka pasur trishtim qoftë edhe për gjendjen e mjerueshme në të cilën ndodhet arsimi, shëndetësia, arti, kultura apo sporti.

Gjendja e sotme e infrastrukturës arsimore tek shkollat tona udhëhequr nga disa drejtor si militantë të thekur është gati e mjerueshme, administrata nga mungesa e hapjes të vendeve të punës thuajse nuk ofron asnjë shërbim,pavarësisht se kryetari i komunës del gati nga dy herë në vit në shtetet e perëndimit, nuk ka sjell asnjë informacion mbi vendosjen e kontaktit me Shoqata tona që kemi në botën e jashtme, me kompani, afarist apo institucione tjera të sferave të ndryshme.

Atij i mungojnë kontaktet me komunat si motra nga Shqipëria e Kosova ku nëpërmjet binjakëzimit diçka do të përfitonte në shërbim të një qeverisje më të mirë, nuk ka realizuar asnjë takim të organizuar me Shoqatën e mjekëve për të parë gjendjen faktike të shërbimit shëndetësorë, nuk ka realizuar asnjë takim për të vendosur bashkëpunim me pak ato subjekte afariste që veprojnë në komunën tonë dhe të cilës i plotësojnë një pjesë të buxhetit,asnjë lloj takimi zyrtar të organizuar nëpër shkolla për të parë si mund të ndihmohet arsimi, asnjë takim të realizuar në Bashkësitë Lokale për të parë cilat janë nevojat e tyre, përkujdesja ndaj botës studentore thuajse nuk ekziston fare arsye ku mendoj se kryetarin aktual duhet ta bëjnë të ndjehet keq përballë qytetarëve të cilët i kanë dhënë votën e në veçanti karshi prindërve, ku bursat në vend t’u shpërndahen nxënësve për të përjetuar suksesin e tyre si të admiruar e të shpërblyer nga taksa-paguesit e komunës së tyre,mesa duket një pjesë të tyre i marrin lokalet rinore të cilat frekuentohen shpesh nga kryetari ynë aktual i komunës së Osllomesë.

Duke iu referuar shembujve të mësipërm, kuptohet lehtësisht se në filozofinë e tij politike nuk ekzistojnë aspak idetë e organizimit të çdo fundvitit për të promovuar dhe shpërblyer qoftë dhe me një mirënjohje publike, shembujt e qytetarisë së mirë, duke bashkuar në një tribunë nderi, veteran të arsimit, pedagog të shquar, afarist të suksesshëm, Shoqata të ndryshme të jetës civile, sportistë, studentë të dalluar, njerëz të njohur e të panjohur, që jashtë vëmendjes publike japin shembuj përgjegjësie, qytetarë të vlerave tona me të cilët duhet të krenohemi, si që ishte rasti me artistin tonë Zeni Ballazhi, fitues i logos së 100 vjetorit të pavarësisë të shtetit tonë shqiptarë, e për të cilin nga Komuna prej ku ai ka origjinën nuk u tha qoftë edhe një fjalë urimi, njerëz për të cilët shoqëria jonë ka nevojë si i verbëri për dritën e syve.

E kur jemi tek 100 vjetori i pavarësisë, nëse Komuna si motër ajo e Zajazit, ka ngritur një ekip i cili do të kujdeset që nëpërmjet manifestimeve të kujtohet kjo ngjarje e madhe e kombit tonë, tek buxheti i komunës tjetër shqiptare për 100 vjetorin e pavarësisë nuk është paraparë asnjë program manifestimesh, nga Komuna e cila mbart një emër me toponim sllavë,e të cilës nuk pranoi për t’ia ndryshuar emrin Kryetari aktual,ku nëpërmjet këtij gjesti në prag të 100 vjetorit të pavarësisë, kam bindjen e plotë se njerëzit e gjakut tonë,kudo që ato i kemi do të motivoheshin për të kontribuar në momentin e fitores për një Kërçovë të bashkuar.

Garancia e fitoreve tona nuk mund të jetë një individ, por një ekip i përkushtuar dhe bashkësia e vlerave njerëzore,e gjithë shoqëria jonë, të rinj, intelektual, gazetarë, media, shoqëri civile, e të cilët duhet të shndërrohen në aleat më të mirë të kësaj sfide, e jo të veprohet me shembujt e strukturës udhëheqëse të komunës sonë, e deri dje, strukturë udhëheqëse e degës së partisë shqiptare, ku vendi i meritokracisë, i jepej klientelizmit dhe vendi i përkushtimit i jepej servilizmit.

Realiteti që na është ofruar dhe atë që po ndjejmë në ditët e sotme, është ndeja e idealistëve të heshtur dhe krekosja e militantëve të flaktë apo interesxhinjëve të cilët jo për faj të tyre, po për qejfet e zyrtarëve lokal sot po injorojnë ato pak vlera që kanë ngel brenda shoqërisë sonë.

Së fundi, dua të shpjegoj se ky rrëfim nuk ka në thelb inatin tim verbal ndaj askujt, aq më pak ndaj njeriut tim, por i detyruar nga sjellja jo korrekte e kryetarit të komunës së Osllomesë, sikur të mos njiheshim bashkë, po përpiqet të më paraqesë si njeri destruktiv para miqve të përbashkët, veprim i cili më detyroj të reagoi publikisht, në mënyrës që ti them se diversiteti i mendimeve, ndihmon në shëndoshjen e demokracisë.

E kundërta e kësaj, ndrydhja e mendimeve nëpërmjet presionit sjell regres. Koha në të cilën jetojmë kërkon shkëmbim pikëpamjesh të cilat fare mirë mund t’i paraqesim edhe në debate televizive, ku për fat të keq gati se nuk ekzistojnë në TV -lokale në qytetin ku ne jetojmë, por që unë jam gjithmonë i gatshëm dhe i hapur për të dhënë kontributin tim.

Tani pas tre vitesh, nga koha që na ndan kur dola si kandidat i pavarur, më përforcohet bindja absolute se skam asnjë lloj pendese, që dola për të garuar e për t’i ofruar një alternativë krejt ndryshe qytetarit tim, nga ajo që shikojmë dhe përjetojmë në qeverisjen aktuale të këtyre viteve.

Ku do në botën demokratike pushteti i politikës së lirë janë dy pushtete që zhvillimi demokratik i ka ndarë veç e veç, duke ndarë rolet e ku detyra e atij që qeveris është për të vepruar në shërbim të qytetarëve, dhe tjetër ai oponencës, është të artikuloj ide të reja në shërbim të qytetarëve, në mënyrë që zgjedhësve t’u mundësohet të informohen e të formojnë opinionin e tyre lirshëm, për të vërtetat e të parit të institucionit.

Fare për fund, më ngelet të them se kurrë nuk jam marrë e s’do merrem me jetët private të të tjerëve. Kundërshtari për mua nuk është njeriu por vizioni, argumentet, sjelljet e veprimet politike që janë të kundërta e të ndryshme apo gati të pa afrueshme me të miat. Jeta për mua vlen të jetohet vetëm në pjesën kur zemra nuk është peng i frikës e ngurrimeve që mendja i shndërron në bindje për të vepruar.