Beqir Limani – shembull i sfidës ndaj pushtuesit…!

Sa herë shtatori troket në derë, në ndërdijen tonë po shfaqet kujtesa për ngjarjet që përfshinë vitet e fundshekullit të mileniumit dy.

Padyshim se në altarin e ndërtimit të idealit për liri dhe bashkimin shqiptar na shfaqen figura të ndritura e në veçanti, ATA, që vunë jetën e tyre në kalldrëmin e rrugëtimit përpara.

Në këtë shtrojerë përpjekjesh domosdo krahas të tjerëve duket edhe Beqir Limani, figura e ndritur e martirit-hero, nga Kollara e Kërçovës, i cili asokohe (para njëmbëdhjetë vjetësh) vuri jetën përballë tytave të makinerisë shfarosëse të dinjitetit të nëpërkëmbur të shqiptarëve të Kërçovës; duke mbrojtur me dinjitet pragun e shtëpisë. Në atë shirit dhembjesh atëkohë (18 shtator), gjithë një vullnet i ndrydhur u vu përballë hekurit shfarosës të makinerisë pushtuese.

I madh e i vogël iu bashkëngjitën varganit të protestës, për ta shfaqur mospajtimin me robërinë. Zëri i protestës së heshtur mori dhenë e dëshira për ta prekur agimin e lirisë u rrit ndjeshëm. Si sot, duken të freskëta kujtimet për figurën e Tij të ndritur, tingëllon fjala e tij e butë”vëllaçko” e cila kumbon fuqishëm në mendjen e çdokujt që Atë e njohu për së afërmi.

Në rrugëtimin drejt kësaj drite padyshim se sfidat e errësirës janë të mëdha e ndërkohë altari i heronjve, ideali i tyre i kulluar do t’jetë gjithnjë oreoli, obelisku, shpresa; ku do të pikëtakohen dëshirat tona të zjarrta në rrugëtimin përgjatë udhës së dritës. Thonë: “Heronjtë s’vdesin-kurrë!”.

Adem Xheladini

/Bota Sot