Dallimi në paga shumë i madh në Maqedoni, disa mezi ia dalin e disave u teprojnë!

Më se evidente është dallimi mes pagës më të ulët dhe asaj më të lartë neto në vendin tonë. Të dhënat e fundit të Entit Shtetëror të statistikave tregojnë se pagë më e lartë neto për muajin dhjetor ka pasur në sektorin programim kompjuterik, respektivisht rreth 100 milionë denarë. Kur jemi te pagat është e çuditshme dhe e pakuptimtë kur politikanët me vetëdije të plotë tallen me vetëdijen e qytetarëve duke deklaruar se ata jetojnë vetëm nga pagat.

Të njohur në këtë drejtim janë presidenti i vendit, Stevo Pendarovski, i cili pati deklaruar që po mos të ishte president edhe ai do ta lëshonte vendin sepse është e vështirë të mbijetohet me pagë mesatare prej 400 eurosh. Nga ana tjetër, ministri i Punëve të Jashtme, Bujar Osmani, ka deklaruar se burim i vetëm financiar për të është paga që merr ai, po nuk mori pagë duhet të kërkojë borxhe për mbijetesë. Ndërkaq, qytetarët e papunë e ata të punësuar me paga minimale duhet të shohin këtë teatër që zhvillohet para syve tyre, shkruan Zhurnal.

Disa paga në qiell disa përtokë –
Më se evidente është dallimi mes pagës më të ulët dhe asaj më të lartë neto në vendin tonë. Të dhënat e fundit të Entit Shtetëror të statistikave tregojnë se pagë më e lartë neto për muajin dhjetor ka pasur në sektorin programim kompjuterik, respektivisht rreth 100 milionë denarë.

Më tej pasojnë aviacioni civil me pagë mbi 80 mijë denarë. Pasojnë veprimtaritë profesionale teknike dhe shkencore me mbi 60 mijë denarë. Por, edhe më tej në shumë sektorë ekziston mungesë e fuqisë punëtore.

Sipas kryetarit të punëdhënësve, Angell Dimitrov, mungesa më e madhe e punëtorëve evidentohet në sektorët e industrisë, ndërtimtarisë dhe veprimtarisë hotelerike.
“Mungesa e punëtorëve vërehet në industrinë tekstile, ndërtimore, industrinë kimike, në sektorin e ndërtimtarisë dhe hotelerisë dhe turizmit. Në Ohër po bëjnë përgatitjet për sezonin e verës dhe do të sjellin shumë punëtorë nga jashtë. Nëse i krahasojmë edhe përvojat e fqinjëve tanë do të konstatojmë se në këto sektorë më së shumti punësohen punëtorë të huaj”, deklaroi kryetari i punëdhënësve, Angell Dimitrov.

Dimitrov shton se sipas rregullativës së Bashkimit Evropian, paga më e ulët duhet të jetë rreth 50 për qind e pagës mesatare. Synimi, sipas tij, është që sa më shumë punëtorë të marrin pagën minimale dhe të gjithë të tjerët të kenë paga më të larta. Paga minimale neto nga muaji mars do të jetë 22,500 denarë dhe ende është ndër pagat më të ulëta në rajon.

Pendarovski thotë se do të shpërngulej nga Maqedonia po të kishte rrogë 400 euro, Osmani me gati 2.000 euro rrogë thotë se mund të detyrohet të marrë borxh –
Muaj më parë presidenti aktual dhe kandidati për edhe një mandat për president, Stevo Pendarovski deklaroi se personalisht so të shpërngulej nga Maqedonia e Veriut, po të mos ishte president, marrë parasysh faktin se paga mesatare në vendin tonë sillet rreth 400 euro.

“Paga mesatare në shtetin tim, mendoj se është ngjashëm edhe në shtetet tjera që jemi tani në skenë, është diku 400 euro. Edhe unë po të mos isha president, edhe unë do të largohesha vetë nga Maqedonia, nga vendi im”, tha Pendarovski.

Së fundmi, edhe kandidati për president nga radhët e BDI-së, Bujar Osmani në thotë se edhe përkundër asaj që është ministër i Punëve të Jashtme, e që merr një pagë gati 2.000 euro në muaj, nëse nuk e merr rrogën për një periudhë, detyrohet të marrë borxh për të mbijetuar gjatë muajit.

“Miqtë qeshin kur u them se nëse një muaj nuk marr pagë, do të duhet të marr borxh. Njerëzit thonë “nuk ka shanse”, kaq vite zyrtar, kushedi çfarë pritjesh ka për zyrtarët, por ja po e them sinqerisht se nëse një muaj nuk më vjen rroga, unë e kam patjetër të marr borxh që të mbijetoj. Mua mund të më akuzoni për gjithçka por jo për korrupsion. Thjesht e kam kuptuar se korrupsioni është shumë i lidhur me karakterin”, tha Osmani.

Me fjalë të tjera këto dy deklarata të dy politikanëve me peshë në vend tregojnë qartazi mjerimin që ka kapluar qytetarët e këtij vendi.
Papunësia, problemi kryesor i të rinjve në vend, këtë e thotë edhe Komisioni Evropian-

Papunësia e të rinjve mbetet problem për të cilin Maqedonia e Veriut duhet të punojë shumë në këtë drejtim. Kjo është konstatuar në Raportin e viteve që lamë pas mbi progresin e Maqedonisë së Veriut në rrugën e saj të integrimit evropian. Të rinjtë dhe përmbushja e nevojave të tyre mbetet sfidë e cila duhet adresuar dhe zgjidhur. Raporti thekson mangësitë ku vendi duhet të punojë si dhe pikat ku vendi ka bërë përparim.

Theks i veçantë ky raport i kushton papunësisë së të rinjve, ku thuhet se ajo mbetet e lartë në 30.9%, mirëpo theksohet se ajo është në rënie të vazhdueshme, por që ka shumë punë për t’u bërë në këtë drejtim. Por, tani fundi i muajit tetor flet ndryshe ku kjo rënie ka stagnuar dhe ka filluar një rritje e pritshme e nivelit të papunësisë, më shqetësuese se kaq është fakti se kjo rritje do të vazhdojë edhe në muajt në vazhdim.

Sa ma shumë duhet të fokusohet në këtë drejtim për zbutjen e nivelit të papunësisë, sepse papunësia prodhon kriza të tjera që pastaj janë edhe më vështirë për tu menaxhuar e kontrolluar, sikurse ajo e eksodit të të rinjve. Sepse, me këtë avaz nuk po largohen vetëm të rinjtë por edhe mosha mesatare e qytetarëve që janë të larguar nga puna ose janë të pakënaqur me punën që e bëjnë. Kjo për shkak se nuk përputhen profesionet e të punësuarve me punën që e bëjnë, dhe me këtë vendi humbë edhe të rinjtë edhe profesionistët e fushave të ndryshme.

/Zhurnal.mk