Universiteti i Tetovës nuk është vetëm për t’u reklamuar politikanët..!

Gati një dekadë, sa isha në menaxhmentin e Universitetit të Tetovës, nuk kishte ditë që nuk përballeshim me sulme politike. Madje, një ditë rektori i Universitetit “Shën Kirili dhe Metodi”, Prof. Dr. Velimir Stojkoski, më pyeti: “Çfarë po ndodh me Universitetin e Tetovës?”. “Si mendoni?”, ia ktheva unë. Ministri i arsimit dhe shkencës (kuadër i BDI-së, shënimi im) më tha: “Ne go biva DUT za nishto”. Unë qesha me të madhe dhe i thashë: “Vaka e koga nasmejaniot te nasmeva”.

Për një kohë dhe na bllokuan në Agjencinë e Akreditimit dhe Evaluimit, derisa një ditë dola taktit dhe i thashë para të gjithë anëtarëve kryetarit të Agjencisë: “Do të thërras konferencë për shtyp, do të tregoj ç’po ndodh me instruksionet që ia bëni në prapaskenë Universitetit të Tetovës, kurse programet studimore që nuk po i na akreditoni do t’i akreditojmë në Kosovë” dhe kështu lëshuan pe, duke akredituar mjekësinë, studimet e doktoraturës dhe shumë programe të reja studimore.

Dhe politikanët, pa fijen e turpit, vinin në Universitetin e Tetovës, reklamoheshin dhe iknin, sikur mos ketë ndodhur asgjë, duke ia ngulur në vazhdimësi universitetit thikën pas shpine.
Në evalumin e fundit ndërkombëtar në vitin 2017 ishin po këta politikanë, që Universitetin e nxorën në vendin e 7 në rang kombëtar dhe që atëherë më nuk ka pasur asnjë evaluim të universiteteve, por qeveria përsëri refuzon të miratojë hapjen e studimeve të doktoraturës në Universitetin e Tetovës, edhe pse me një mori profesorësh të akredituar nga Agjencioni për evaluim dhe akreditim.

Thika e fundit pas shpine është kjo me diskriminimin e pagave, që u bë mediatike këto ditë dhe uroj të jetë e fundit nga kjo nomenklaturë politike, që Universitetin e shfrytëzoi vetëm për vota dhe reklamim politik.
Shkruar nga Prof.Dr. Arbër Çeliku

/ms