Autostrada Kërçovë-Ohër mund të “hajë” mbi 600 milionë euro.. (VIDEO)

Po bëhet gjithnjë e më e sigurt se autostrada Ohër – Kërçovë e gjatë 57 kilometra, e cila është në ndërtim e sipër për tetë vite, do ta kalojë shumën prej gati 600 milionë euro, shkruan Alsat.

Ministri i Transportit dhe Lidhjeve, Boçvarski, nuk mohon se kjo mund të ndodhë, por për momentin nuk dëshiron të konfirmojë.

“Nuk do të doja të paragjykoja tani në këtë moment, sepse e shihni se cilat janë tendencat në botë dhe me rritjen e çmimeve. Ne kemi kontrata aktive me kontraktorët dhe ato kontrata duhet të respektohen nga të gjithë. Për mua, gjëja më e rëndësishme është të vazhdojnë të ndërtojnë në mënyrë aktive … “, tha Blagoj Boçvarski – Ministër i Transportit dhe Lidhjeve.

Boçvarski pohon se është ndërtuar më shumë se 65% e autostradës, por se aktualisht ka një vonesë për shkak të dimrit.

YouTube video
“…Tani ka vend që operimi, kontraktorët, mekanizimi të dalin në terren dhe këtë sezon ndërtimi ta përfundojnë pjesën më të madhe të autostradës”, u shpreh Blagoj Boçvarski – Ministër i Transportit dhe Lidhjeve.

Boçvarski në maj të vitit të kaluar gjatë një vizite në një nga lokacionet në autostradë tha se janë siguruar para dhe se duhet të punohet në terren. Ai përsëriti se pret që deri në fund të vitit 2023 autostrada të jetë plotësisht funksionale.

Ndërtimi i autostradës Ohër-Kërçovë filloi në vitin 2014. Fillimisht ishte menduar të përfundonte në vitin 2018, më pas afati u zhvendos në qershor 2021, dhe më pas në fund të 2023. Duhej të kushtonte 378 milionë euro, por shuma u bë dyfish më e lartë.

VIDEO:

/ Alsat.mk