ASH-AAA sot i bashkohet protestës, Sela dhe Gashi thirrje qytetarëve..

Koalicioni opozitar shqiptar ASH-AAA do ti bashkohet protestës së sotme në Shkup për drejtësi për rastin “Monstra”, që është thirrur nga Këshilli organizativ i kryesuar nga familjarët e të dënuarëve.
Kreu i Aleancës për Shqiptarët, Ziadin Sela ka bërë thirrje për protestë masive, duke ftuar qytetarët që sot të dalin masivisht në Shkup.

“ Të dashur vëllezër dhe motra, kur institucionet që ndajnë drejtësinë bien në shërbim të politikanëve që e shtrembërojnë atë duhet të dilet dhë të protestohet,kur liria individuale e dikujt cënohet,ju duhet të mbroni lirinë tuaj duke e mbrojtur lirinë e tjetrit,prandaj me dinjitet dhe në një protestë paqësore, dilni dhe flisni zëshëm” shkruan kreu i ASH, Ziadin Sela.

Protesta është thirrur kundër rasteve të montuara, sic është rasti “Monstra” , që ishte rikthyer në rigjykim, por që prokurorja e rastit Fatime Fetai kishte mbrojtur të gjitha akuzat e ngritura ndaj të dënuarëve, për të cilët pala mbrojtëse nxorri prova për pafajësi dhe konsideron se rasti është i montuar.

Protestën e njoftuar për rastin Monstra do ta mbështes edhe kreu i Alternativës, Afrim Gashi.
Ja njoftimi i tij në Facebook.

“E drejta për protestë, përveçse mekanizëm për të shprehur qëndrimin publik, është edhe mjet përmes të cilit shprehet revoltë, pakënaqësi dhe reagim ndaj një padrejtësie. E tillë është edhe protesta e nesërme kundër akuzës së përsëritur ndaj të akuzuarve në rastin “Monstra”.

Në këtë drejtim, konsideroj se protesta që organizohet nesër nga familjarët e të akuzuarve është një e drejtë legjitime për të shprehur pakënaqësinë jo vetëm të kësaj familjeje, por edhe të gjithë neve që kemi kaq shumë dyshim në sistemin e drejtësisë.

Me këtë rast, u bëj thirrje të gjithë pjesëmarrësve në këtë protestë për ta ruajtur gjakftohtësinë ndaj çfarëdo provokimi, ndërsa – duke qenë në kushte pandemie – po aq i rëndësishëm është edhe kujdesi për shëndetin” – shkruan ktyetari i Alternativa, Afrim Gashi.
Marshi i protestës do të nis në ora 13:00 nga Parku i Çairit, duke u finalizuar tek Prokuroria e Përgjithshme.

Bedri Ajdari, në cilësinë e kryetarit të Këshillit Organizativ tha se me këtë protestë do të kërkohet drejtësi, pas fjalëve të fundit të prokurores Fatime Fetai.

“Të nderuar vllezër e motra, para disa ditëve prokurorja e rastit ‘Monstra’, Fatime Fetai, e përmbylli fjalën e saj përfundimtare me akuzën se, të akuzuarit jane fajtor për vrasjen e pesfishtë tek Liqeni i Smilkovës, madje duke i akuzuar për vepër teroriste duke i qëndruar besnike shefes së saj Gordana Jankulloska dhe prokurores së parë Gordana Geshkoska. Amaneti në vend!

Prandaj, në emrin tim personal si kryetar i Këshillit Organizativ për rastin ‘Monstra’ dhe të familjarëve të të burgosurve, i ftojmë të gjith shqiptarët (pa marrë parasysh bindjet e tyre politike) që të na mbështesin dhe ta ngremë zërin e popullit për drejtësi”, ka bërë thirrje familjari Ajdari. Përmes kësaj proteste do të kërkohet edhe zbardhja e rasteve të tjera të montuara.

/(INA)