Zaev dhe Ahmeti u morën apo nuk u morën vesh, edhe 4 ditë afat?

Ka apo nuk ka shumicë parlamentare dhe Qeveri koalicioni gjatë këtyre ditëve…dilema vazhdon të mbetet, pasi që dje në media krerët e LSDM dhe BDI, Zoran Zaev dhe Ali Ahmeti theksuan se janë kanë shumë pika të përbashkëta, por edhe dallime midis tyre, përcjell INA.

Por siç mësohet nga INA në koluaret partiake, dyja partitë kanë arritur marrëveshje dhe se priten detaje të formësimit të saj, pasi që Zaev ka kërkuar kohë që të shpalos detaje edhe në strukturat partiake të LSDM-së dhe të sigurojë përkrahje.

“Bisedimet do të vazhdojnë në ditët në vijim dhe besoj se sapo të kemi çfarëdo lloj hapi të cilin do të mund ta ndajmë me qytetarët menjëherë do ta bëjmë këtë përmes mediave”, theksoi Zaev.

Ahmeti theksoi se është biseduar rreth platformave që t’i përafrojnë qëndrimet, duke shtuar se do të varet nga vullneti i dy palëve që të arrihet epilog pozitiv në interes të shtetit.

“Unë nuk dua t’i ngarkojë bisedimet dhe nuk dua që ta them fjalën e fundit. Ne investojmë në çështjen e shqiptarëve, jemi në drejtim të mirë dhe jemi të gatshëm këtë ta bëjmë për shtetin pasi përfitim do të ketë stabiliteti i shtetit, afrimi i komuniteteve, duam dhe jemi të gatshëm këtë ta bëjmë për shtetin”, theksoi Ahmeti.

Duke folur për çështjen e kryeministrit shqiptar, që ishte premtim parazgjedhor, Ahmeti ka vlerësuar se sa janë afër, aq janë edhe larg.

Ndërkohë, afatet po rrjedhin dhe se kanë ngelur edhe katër ditë deri më 15 gusht kur duhet që Zaevit ti jepet mandati nga presidenti për formimin e Qeverisë. Zaev është optimist se do të ketë vullnet mes dyja palëve dhe se këtë javë do të marrë mandatin.

Nëse do të ketë epilog pozitiv, atëherë Qeveria do të formohet nga LSDM me 46 deputetë dhe BDI me 15 deputetë, përfshirë edhe një deputet nga PDSH-ja, kështu që me këtë sigurohen 62 mandate deputetësh.

/(INA)