Gruevski u arratis për në Shqipëri nga uji dhe jo nga toka, ja nga ku ishte nisur me skaf

Ish-kryeministri Nikola Gruevski nuk u arratis për në Hungari nga shtëpia e tij, por nga Ohri, më saktësisht nga hoteli “Royal View” i vendosur në vetë bregun e Liqenit të Ohrit, në orën 02:40 pas mesnate, më 10 nëntor 2018.

Këtë në emisionin “Në Qendër” me Vasko Eftov e pretendon ish-sportisti maqedonas Aleksandar Malenko, i cili pohon se e ka pritë Gruevskin në hotelin e ish-bashkëshortes së tij. Malenko theksoi se Gruevski nga orët e para të mëngjesit ka lëshuar hotelin dhe është nisur për në fshatin Lubanishtë të Ohrit, ku e ka pritur një barkë me motor (skaf) nga ku pastaj ka kaluar në territorin shqiptar Tushemishtë. Sipas tij, kjo zonë kufitare është afër dhe se i është dashur vetëm 2 km të kaloj për të mbërritur në zonën e Pogradecit, ku e ka pritur shoferi i tij me makinën Passat, me të cilën më pas kanë vijuar drejt ambasadës hungareze në Tiranë, përcjell INA.

Malenko pretendon se ai personalisht e ka hapur garazhin e hotelit që të dilte Gruevski, i cili u largua me një makinë “Volkswagen Passat” të cilën e ngiste shoferi i tij, ndërsa në makinë kishte edhe njerëz nga mbrojtja e tij personale. Familja e Gruevskit, bashkëshortja dhe vajzat, mbetën në hotel dhe e vazhduan qëndrimin e tyre.

Gruevski më vonë mbërriti në Budapest të Hungarisë nën rrethana të pasqaruara, pasi paraprakisht kishte kaluar përmes Shqipërisë, Malit të Zi dhe Serbisë. Në Maqedoni u hap një hetim, por kërkush nuk mbajti përgjegjësi.

Sipas Malenkos, Gruevski në Ohrid kishte arritur tri ditë më parë – më 7 nëntor 2018, në mbrëmje, me dy automjete: një automjet të MPB-së nga Drejtoria e Gjashtë – sigurim dhe përgjim, si dhe automjetin e tij privat me shofer dhe sigurim. Gruevski kishte arritur me familjen, ndërsa Malenko i kishte pritë në garazh. Qëndrimi ishte paralajmëruar sipas protokollit nga MPB si mysafirë VIP, pa u treguar saktësisht se për këtë bëhet fjalë, gjë që është procedurë standarde sigurie.

/(INA)