Përfundoi me sukses edicioni i parë i festivalit “Kërçova Fest”

Në një atmosferë të mrekullueshme, në Kalanë e Kërçovës, u mbajt me sukses edicioni i parë i festivalit “Kërçova Fest”, një ngjarje që bashkoi artin, muzikën dhe traditën shqiptare.

Në skenën e festivalit performuan artistë kërçovarë të të gjitha brezave, nga 8 deri në 80 vjeç, duke dëshmuar se arti dhe kultura janë vlera që i bashkojnë gjeneratat. Kulmi i mbrëmjes ishte paraqitja e Ansamblit Shtetëror të Këngëve dhe Valleve Shqiptare, i cili u prit me duartrokitje të gjata nga publiku.

Programi u moderua me profesionalizëm nga Liza Zenku dhe Sadik Emroja, të cilët i dhanë ritëm dhe elegancë mbrëmjes festive.
Drejtori i festivalit, Argjent Lika, ndau mirënjohje për individët dhe bashkëpunëtorët që kontribuan në realizimin e këtij edicioni, duke shprehur dëshirën që “Kërçova Fest” të kthehet në një traditë të përvitshme dhe të bëhet një nga ngjarjet më të rëndësishme kulturore në rajon.

Vlen të theksohet se ky festival u realizua falë mbështetjes së sponsorëve dhe donatorëve, pa financim nga buxheti shtetëror i Republikës së Maqedonisë së Veriut. Kjo ka ngjallur reagime, pasi shumë qytetarë theksojnë se edhe shqiptarët dhe mërgata kontribuojnë përmes taksave dhe presin një mbështetje më të barabartë për aktivitetet kulturore që promovojnë trashëgiminë dhe identitetin e tyre.

Edicioni i parë i “Kërçova Fest” dëshmoi se me përkushtim, bashkëpunim dhe mbështetje nga komuniteti mund të organizohen ngjarje kulturore të nivelit të lartë, duke lënë shpresë se festivali do të vazhdojë të rritet dhe të bëhet pjesë e traditës kulturore të Kërçovës.

/tvgurra